ما حدها كتقاقي فالحسنية وهي كتبيض: عقوبة جديدة على الفريق وسط احتجاجات الجماهير السوسية على الضور واللي معه باش يمشيو بحالهم

نزلت العصبة الوطنية لكرة القدم الاحترافية على عدد من الفرق فالقسم الوطني الاول د البطولة بعقوبات، بسبب الأحداث اللي عرفتها مباريات الدورة 5، ومن بين هذه الاندية حسينة أكادير اللي كيعيش أزمة تسييرية حيث الجماهير ديال كتطالب برحيل المكتب المديري برئاسة أمين الضور.
ودارت لجنة الانضباط فالعصبة الوطنية لكرة القدم الاحترافية اجتماع، وقررت تعاقب عدد من الفرق ومن بينها حسنية أكادير بسبب الماتش ديالو مع الرجاء الرياضي، وتم تغريم الفريق مبلغ 20.000 درهم لاستعمال جماهيره الشهب الاصطناعية ورميه للمقذوفات، وذلك طبقا لمقتضيات المادة 105 من قانون الانضباط.
وكيعيش فريق حسنية اكادير أزمة تيسيرية خانقة خلات الجماهير تنزل الشارع تحتج وتطالب برحيل المكتب المسير برئاسة أمين الضور، وباغينهم يخليو الفريق ويمشيو بحالهم، حيث كيشوفو أنهم فشلو فتحقيق طموحات عشاق الحسنية اللي مقفرينها فبداية هذا الموسم حيث عندهم غير 2 نقاط خداوها من 5 الماتشات بعدما خسرو 3 وتعادلو فجوج.