كواليس افتتاح البرلمان: وزيرة تعطلت وتحدات أعراف الوزراء.. والبرلمانيين المتابعين فالقضاء بملفات جرائم الأموال ماحشموش وكيعلقو على خطاب سيدنا.. السيمو وبنتو دايرين فوضى قبالت البرلمان

تميزت جلسة إفتتاح الدورة الأولى من السنة التشريعية الثالثة من الولاية التشريعية الحادية عشرة، اليوم الجمعة، باستقبال الملك محمد السادس لكل من أجاي بانغا رئيس البنك الدولي وكريستينا جورجيفا المديرة العامة لصندوق النقد الدولي بمقر البرلمان.
لأول مرة فتاريخ البرلمان، حضرو جوج مسؤولين كبار فمناصب دولية كتعلق بالسياسة المالية والنقدية.
غيثة مزور..وزيرة تحدات الاعراف وعلقات على الخطاب الملكي
مور خطاب الملك اللي افتتح به الدخول السياسي والتشريع، انصرف الجميع نحو سبيله، في مقدمتهم أعضاء الحكومة وكبار مسؤولي المؤسسات الرسمية، لكن بقات غيثة مزور وزيرة الانتقال الرقمي "حاصلة" في قاعة الجلسات الكبرى الى جانب البرلمانيين والبرلمانيات.
مزور تحدات العرف لي كان سائد بخصوص امتناع الوزراء من التعليق على الخطاب الملكي داخل البرلمان للصحافة. مزور علقات وصرحت بهاد الخصوص. كانت شجاعة.
عيدودي والسليماني والتويزي وآخرون.. متابعون في جرائم الأموال يصرحون ويعلقون على الخطاب
رغم الجدل اللي اثارو قرار مكتب مجلس النواب بمنع البرلمانيين اللي عندهم متابعات قضائية كتعلق بالمال العام، يدخلو لجلسة الافتتاح لي ترأسها سيدنا، ومن بعد التراجع عليه، إلا ان النواب المعنيين بالقرار اليوم جاو فرحانين ودخلو للقبة.
من هاد البرلمانيين كاين لي داز للسرعة القصوى باش يفتح تكتوك ويدير فيه فيديو يعلق على الخطاب الملكي، بحال النائب عن فريق الحركة الشعبية عبد النبي عيدودي رئيس جماعة دار الكداري بإقليم سيدي قاسم، المدان في قضية اختلاس أموال عمومية وتحكم بعامين.
عيدودي كيف التقطت كاميرا "گود" كان فتح لايف فتكتوك باش يوصل للجمهور ديالو بلي راه حاضر ناضر فالبرلمان وعطا تعليق على خطاب سيدنا.
وفي سياق متصل بالبرلمانيين المتابعين، احمد تويزي رئيس فريق الأصالة والمعاصرة ويونس السليماني البرلماني عن فريق الاحرار نزلو من الدروج المفرش بالبساط الاحمر، بشكل عادي واخدين راحتهم.
التويزي ماقداتو فرحة وصرح للاعلام الرسمي، وناشط وبعض النواب واصدقائه قالو ليه على سلامتك. متابع فملف بجرائم الاموال.
بنسليمان تحكم عليه بالادانة فملف اختلاس اموال كوب 22، فاش كان مع البي جي دي. دبا برلماني باسم الاحرار.
السيمو وبنتو.. الفوضى قبالت البرلمان
كعادته، البرلماني محمد سيمو من القصر الكبير، دار البوز قبالت مقر البرلمان بشارع محمد الخامس وفي ممر الراجلين، كيصرح بالغوات كأنه شي واحد من المحتجين لي جاي يحتج على الحكومة والبرلمان.
السيمو مكانش بوحدو، كيف ديما، جاب معاه بنتو البرلمانية وتاهي كتصرح.
كيف عاينت "گود" دارو فوضى وعرقلو عمل البوليس لي مكلفين بتأمين الباب الرئيسي للبرلمان.
البرلمانية البوگوصة.. بنت البرلماني لحموش
البرلمانية اللي كتوصف بلي راها بوقوصة واللي مكتعرف تهضرمع الصحافة وعزيز عليها تبان واعرة وكلاص. اليوم هبطات منطابي روج رفقة برلمانيين وبرلمانيات وحشمانة ولكن غير شافتالكاميرات وبدات تبتسم.
المصورون طلبو منها ورفيقاتها النائبات يوقفو شويا باشياخدو ليهم صور، طبعا وقفات وابتسمت، ومن بعد شكراتهم . البرلمانية الوحيدة للي قالت المصورين شكرا حيث صوروتوني.
لقاءات الفرق.. غليان وسط الاغلبية
الخطاب الملكي حدد التوجهات الكبرى خصوصا في تنزيل برامج الحماية الاجتماعية والدعم يتفعل بطريقة تديريجية وياخدو لي كيستحقو. لكن فهاد السياق الاغلبية كتعيش غليان، البام مضاد مع الاحرار، والاستقلال مضاد مع البام. شي كيحفر لشي سياسيًا وبرلمانيا.
شفنا قضية محاولة مكتب مجلس النواب ببعث رسائل الى الرأي العام على ضرورة تنضيف البيت الداخلي، بمنع البرلمانيين لي عندهم ملفات خانزة ديال المال العام فالمحاكم يجيو ويخويو القبة، لكن القرار صدم برفض قيادات احزاب كتشوف بلي هادشي تدخل في القضاء لي عندو الحق في تجريدالبرلماني ومنعه من ولوج البرلمان.
فهاد القرار ناض صداع كبير بين الاحرار والبام، خصوصا تيار مراكش لي كينتمي ليه احمد تويزي رئيس فريق البام بمجلس النواب وللي باقي عندو جلسات فملف بجرائم الاموال.
اضافة الى هادشي، الهجوم اللي كيشنو حزب الاستقلال على امين عام البام عبد اللطيف وهبي بصفته وزيرا العدل، خصوصا فيما يتعلق باصلاح القانون الجنائي او اصلاح مدونة الاسرة، باقي داير انقسام وسط هاد الحزبين، رغم محاولة رئيس التحالف الحكومي تذويب هذه الخلافات لكن الاستقلال باقي كيصيفط رسائل سياسية بلي غايوقف ضد اي توجه حداثي فالمدونة او القانون الجنائي.
هادشي كامل وملفات اخرى غايتم مناقشتها داخل اجتماعات الفرق البرلمانية لي كاينا اليوم بالليل، منها ديال الفريق الاستقلالي لي غايجتمع فاوطيل حسان.
https://fb.watch/nFeV47HbE4/?mibextid=qC1gEa
https://m.facebook.com/story.php?story_fbid=pfbid02326BsHVXmxmYHtoAS5m2T5FHBeTTYyigHgggRVCvF4vcyE4AyNTDyykfJnB1MRFel&id=100060538167148&mibextid=qC1gEa
https://m.facebook.com/story.php?story_fbid=pfbid02v6dfD4Bqf6ip9DRs6FgjgspmvZ1gw75GEfcHWSVFkuDrxGBPGsMV2ZtCxkbyGugGl&id=100060538167148&mibextid=qC1gEa
https://m.facebook.com/story.php?story_fbid=pfbid0UHN2Rhfs9GZX13YHzMGWmxiY5ecRnCFpCnTbEdxmESekCXxoqwgatLeD9EEnvucNl&id=100060538167148&mibextid=qC1gEa