إبراهيم دياز غايب على لاليست إسبانيا كيفما غاب على لائحة الركراكي والإسبان باغيين يضمنو لامين يامال

غاب مرة اخرى المغربي الاسباني إبراهيم دياز نجم ريال مدريد على لاليست ديال المنتخب الاسباني استعدادا لتاريخ الفيفا المقبل، كيفما غاب على لاليست ديال المنتخب المغربي.
الناخب الاسباني لويس ديلافونتي، كشف اليوم الجمعة على لاليست ديال المنتخب الإسباني لمواجهة كل من قبرص وجورجيا يومي 16 و 19 نونبر الحالي، ضمن اقصائيات كاس اوروبا 2024، اللائحة فيها 25 لاعب وما فيهاش ابراهيم دياز.
ومازال كلشي كيتسنا الوقت اللي غيقرر فيها إبراهيم دياز يدير حد للتشويق ويكشف بشكل رسمي المنتخب اللي غيلعب معه واش المغرب او اسبانيا.
البارح الناخب الوطني وليد الركراكي ما بغاش يدوي على موضوع ابراهيم دياز فالندوة الصحافية اللي علن فيها على لاليست الأسود ضد ارتريا وتنزانيا، وقال ديجا دويت فهادشي وانا دابا مركز مع اللاعبين اللي قررو واختارو يلعبو للمنتخب المغربي، وهذا الشي شافوه بزاف ديال المتتبعين انه كيخلي الاحتمالات كلها ممكنة، بعدما كانت المعلومات كتشير قبل اسابيع إلى ان دياز قرر يلعب للمغرب.
من جهة اخرى، عيط الناخب الإسباني المغربي الأصل لامين يامال لاعب البارصا، اللي اختار يلعب لاسبانيا، وباغيين يكملو له 3 الماتشات دوليين مع المنتخب الاسباني بعدما لعب غير 2 حتى لدابا، يضمنو انه يبقى يلعب لاسبانيا ديما.