الفرنسيين: وليد الركراكي عيط لعز الدين اوناحي واخا موعت وما غيلعبش ماتش تنزانيا

شكك الإعلام الفرنسي فالمشاركة ديال الدولي المغربي عز الدين اوناحي لاعب اولمبيك مارسيليا الفرنسي مع المنتخب الوطني المغربي فالماتش الجاي ضد تنزانيا ضمن الجولة الثانية من اقاصائيات كاس العالم 2026.
وحسب موقع la Provence الفرنسي، فعز الدين اوناحي نجم وسط تيران اولمبيك مارسيليا، اللي عيط له الناخب الوطني وليد الركراكي ضمن 25 لاعب للمعسكر الإعدادي اللي غيبدا اليوم الاثنين بمركز محمد السادس، ما غيشاركش ضد تنزانيا يوم 21 نونبر، وانه غيدير فحوصات طبيبة تحت إشراف الطاقم الطبي للمنتخب المغربي.
نفس المصدر وضح ان النجم المغربي مازال كيعاني من الاصابة اللي خلاتو يغيب عن اولمبيك مارسليا فالماتشات اللي فاتو، وهي الاصابة اللي جات بسبب السقوط دياو على ظهرو فالدروج ديال دارو، وان اللاعب مازال كيخضع للعلاج بتتبع من الطاقم الطبي للنادي وغيكمل العلاج ملي يكون فمعسكر ليكيب ناسيونال، ومعولين مارسيليا انه ملي يرجع لهم يكون برا باش يبدا يقلب على بلاصتو فالتشيلة الاساسية ديال الفريق.