الركراكي: ماشي ساهل تربح تنزانيا وبرافو للاعبين وغنمشوي لكأس إفريقيا بحال باقي المنتخبات وغنخدمو باش نفرحو المغاربة

عبر الناخب الوطني وليد الركراكي على الفرحة ديالو بالبداية المزيانة ديال المنتخب الوطني المغربي فإقصائيات كإس العالم 2026، بالفوز على تنزانيا فدار السلام اليوم الثلاثاء، وشكر اللاعبين وأكد أن الأسود غيمشيو لاكوب دافريك باش يخدمو وبتواضع باش يفرحو المغاربة.
وتحدث الناخب الوطني وليد الركراكي بعد فوز المغرب على تنزانيا بنتيجة 2 لزيرو، وقال: "تنزانيا عندهم فريق مزيان وكيخدمو وماشي ساهل تجي تربح هنا، درنا الخدمة اللي خاصنا نديرو وعارفين شنو كيتسنانا ومزيان تبدا الإقصائيات بالرباح فالماتش الأول، وبرافو على اللاعبين ديالنا اللي تقاتلو فهاد الجو باش يعرفو أن حتى ماتش ما ساهل، ومزيان يلعبو كل ماتش بحال كأس العالم".
وكمل الركراكي: "ماشي ساهل البيلانتي اللي ضيع أشرف حكيمي فأول الماتش وهذا الشي دخل شوية الشك للاعبين ولكن بقاو مكملين حيث عندهم التجربة، وعندنا لاعب بحال حكيم زياش حل لنا المشكل وبونو اللي موعت وجا يتقاتل معنا والدراري كاملين اللي كيلعبو مع فرق كبيرة ملي كيجيو كيبقاو بنفس النيفو ديالهم وكيلعبو به معنا برافو عليهم، وبرافو حتى على الطاقم التقني حيث خدمو معنا".
وبخصوص كأس إفريقيا المقبلة بالكوت ديفوار، قال الركراكي: "الإقصائيات ديال كأس العالم كتبين بلي حتى ماتش ما ساهل، حنا غنمشيو لكوب دافريك نخدمو وماشي بسحاب لنا حنا حسن من الآخرين ونبقاو خدامين باش نفرحو المغاربة".