كيواصل المغرب التألق فالكورة النسوية الافريقية، وهذا الشي تأكد تاني من خلال الجوائز الفردية د الاتحاد الافريقي لكرة القدم للسيدات لعام 2023، واللي حاضر فيها المغرب بقوة، بالإضافة إلى حضور المنتخب المغربي فاللائحة النهائية ديال احسن منتخب أفريقي نسوي، وتواجد ليفار وسبورتينك كازا فلاليست ديال احسن فريق نسوي. وفاللائحة النهائية ديال جائزة احسن لاعبة افريقية، كاينين 3 لاعبات مغربيات مرشحات للفوز بالجائزة وهن أنيسة الحماري، وغزلان الشباك، وفاطمة تكناوت، وراه الشباك وتكناوت كاينين حتى فلاليست فينال للمرشحات للفوز بجائزة احسن لاعبة ممارسة فلافريك، فالوقت اللي كتنافس فيه نسرين الشاد على جائزة احسن لاعبة أفريقية شابة. وبالنسبة لأحسن حارسة مرمى فإفريقيا، كتنافس عليها الكولة خديجة الرميشي حارسة الجيش الملكي والمنتخب المغربي، ومعها فلاليست فينال إيمان عبدالاحد حارسة مرمى سبورتينك الدارالبيضاء. اللائحة النهائية ديال المرشحين للفوز بجائزة احسن مدرب(ة) للكورة النسوية فلافريك، حتى هي كينافس عليها المغرب من خلال الناخب الوطني السابق رينالد بيدروس اللي وصل لثمن النهائي مع اللبؤات فالمونديال، والمهدي قيشوري المدرب اللي وصل مع سبورتينك الدارالبيضاء لفينال دوري ابطال افريقيا سيدات.