واش التلاميذ المغاربة معندهمش أولياء الأمور لي يدافعوا على حق ولادهم في التمدرس، وينظمو اشكال احتجاجية ويكونوا حتى هوما طرف في الصراع الدائر بين المعلمين والدولة عوض يكونوا ورقة ضغط من قبل أحد الأطراف

، كنشوفوا مسيرات مليونية لنصرة غزة بينما ماشفناش حتى ربعها لنصرة أبناء المغاربة لي باقي مدارو حتى امتحان منذ بداية السنة الدراسية بينما خوتهم في الخاص قربوا يكملوا الدورة وفي بعض المستويات غادي يظطرو يبقاو يتسناو صحاب العمومي باش يدوزو الامتحانات الموحدة.
أكثر الإباء اهتماما بمصلحة أبنائه مشا كيجري سجلهم في الخاص، وطبعا ماشي كولشي عندو ترف الاختيار، كاين لي معندو من مدرسة الدولة لين وهذا ماشي عيب راه حق دستوري خاص توفرو الدولة لمواطينيها، ولكن مؤخرا الأغلبية كيحسو براسهم غير حاصلين في خدمات القطاع العام، حاصلين في مدارس الدولة وحاصلين فسبيطاراتها وطرقانها، ولي لقا الجهد باش يلجأ للقطاع الخاص راه مكيترددش واصلا مابقاش خيار، الى عولتي على سبيطار الدولة ومدرسة الدولة بقيتي تم.
ولكن في المقابل وعلى مايبدو أن الإباء المغاربة حتى هوما كيتسناو الدولة تدير ليهم كولشي بلا مايطالبوها بوالو، وشحال من مرة أخلفوا موعد المطالبة بالحقوق ديالهم، بينما دولة متقدمة بحال فرنسا الإضرابات فيها مكتوقفش وعلى ايتها حاجة وكيوصلوا للمبتغى في عدة معارك نضالية، العديد من الاسر وخصوصا صحاب الهجرة القروية معولين على المدرسة في كولشي هي تقري وتربي وتعلم وتخلق، وفاش كيدير الطفل شي سلوك غير مهذب كتقوليه مو آش كيعلموكم في ديك المدرسة، كأن تعليم الطفل ماشي دورها حتى هي، دورها فقط تصبن تجفف تطيب وترغب في الكوميساريات، وفي حالة كانت كتدير روتيني اليومي كتولي تهتم بلانش بوكس كثر مم التعليم، راه خاص مدارس للاباء بعدا يتعلموا يربيو ولادهم باش يكون تعاون بين المدرسة والدار ويكونوا على وعي، ماشي بحال دابا الدراري ماقراوش شهرين والاباء ممسوقينش كاين مظاهرات وحراكات ولكن ماشي بداك القوة لي تضغط على الدولة باش تسرع من تسوية الملف.