كون كانو المغاربة كيتبرعو ويساعدو على بناء المدارس بنفس الكيفية باش كيتبرعو ويساعدو على بناء الجوامع والمقابر كون راه المغرب كلو مدارس من الطراز الرفيع ولكن المغاربة باغين يشريو الآخرة والجنة والدنيا كيتسناو الدولة تقادها ليهم.

من بعد توقيف الاستاذة لي صورات المدرسة لي كتقري فيها مخربة، ناضت حرب بين الأساتذة والوزارة على فايسبوك كولشي يصور ويحط فالمدارس، الوزارة كتحط صور مدارس مصلوحة ونقية، والأساتذة كيحطو صور ديال خربات مسميين عليهم مدارس، وفالواقع راه بجوج عندهم صح، فالمغرب وفالقرى النائية راه كاين مدارس مصلوحة ومدارس مخربة، غير هو ماشي كولشي مصلوح كيف ماباغا الوزارة تروج وماشي كولشي مخرب كيف مكيبينو الأساتذة، وفهاد الحرب لي خاسر هو وليدات المغاربة لي البؤس ديالهم كيتم إستغلالو لاغراض خاصة، وتاحد مكيقلب بصح يصنع الفارق بالنسبة للتلاميذ، حتى ملي كتشوف شي مدرسة مصبوغة ومزينة بمجهودات الإدارة كتلقى شي صورة لمسجد قبة الصخرة ومكتوبة تحت منها القدس عاصمة فلسطين، هنا كيولي يقراو التلامذ فمدرسة رايبة ولكن بلا إديولوجية خير من مدرسة مصبوغة ونقية ولكن محملة بالأفكار الهرائية.
غير هو الملاحظ فالدواوير النائية فالمغرب هو ان الجماعة أهم حاجة عندهم فالدوار قبل المدرسة هي الجامع، وفأي طريق دزتي منها غادي تلقى بلايك كيدعيو للتبرع لشي جامع فشي قنت، وفكل سوق أسبوعي فشي منطقة غادي تلقى رباعة ديال اللحايا كيدورو فالسوق يجمعو للجامع، وحتى الناس ديال الدوار تلقاهم ممكن يتطوعو بايام ديال الخدمة فابور باش يعاونو فالبني ديال شي جامع حيت فيه الآجر، بينما المدرسة كيوليو يعتابرو الأمر لا يعنيهم إلا شي إستثنائات قليلة، أما الأغلبية مستعدين يخدمو فابور من أجل بناء شي جامع ويتبرعو بفلوسهم أو باش ينقيو شي قبور ويدوروها بالصور، كتلقى القبور عندهم أولوية عند السكان من حاجات خريين مهمين كثر وغادي ينفعوهم في حياتهم.
حقا الدولة لي خاصها تبني المدارس ولكن راه أكبر جامعات العالم ومدارسه بناوهم محسنين وعايشين بالتبرعات ديالهم لحد الآن، وملي كتشوف ان المغاربة بالمرفحين والحازقين مستعدين يساعدو في بناء جامع وكتشوف أن أباء التلاميذ فالعالم القروي من كيقدمو كل ما قدرو عليه باش يبنيو جامع كبير ومزيان وفالمقابل كتلقى شي مدرسة كتريب حداهم وفيها كيقراو ولادهم ولكن كيكلسو يشوفو فيها ويتسناو الدولة تجي تقادها، كون كانو المغاربة كيتبرعو ويساعدو على بناء المدارس بنفس الكيفية باش كيتبرعو ويساعدو على بناء الجوامع والمقابر كون راه المغرب كلو مدارس من الطراز الرفيع ولكن المغاربة باغين يشريو الآخرة والجنة والدنيا كيتسناو الدولة تقادها ليهم.