من أسس التقدم والإزدهار هو العدالة الضريبية كولشي يخلص الضريبة على قدم المساواة.. ماشي موظف كيخلص الضريبة وهو خدام ويخلصها وهو متقاعد وواحد النهار وماطال ناشرهم في يوتوب غير من الصالون أو من الكوزينة مدخل لملاين وممخلص حتى ريال

مصر وفي خطوة جد جميلة ومفيدة للدولة وللمواطنين غادي تفرض ضريبة على صناع المحتوى صحاب يوتوب وتيك توك وكاع لي كيتخلصو من برا، وهادشي نيت لي خاص يتدار حتى عندنا هنا، مايمكنش تبقى الضريبة مركزة غير على الموظف تسلخ فيه وتنتف منو وتقتاطع ليه من المصدر، بينما الناس غير كينقزو ويشطحو في يوتوب وتيك توك دارو الديور والطوموبيلات والمشاريع بلا مايخلصو حتى ريال ديال الضريبة، والموظف الدريويش كيبقى يشوف ناس ماقراوش يحالو كيضربو تمارة قل منو كيصورو الفلوس في عام لي ميصورهاش هو حياتو كلها ديال الوظيفة وفي اللخر مكيخلصوش الضريبة بحالو، راه الحكرة والظلم هو هذا، عليها وليتي تلقى شباب من بعد مكيخدمو مع الدولة بالكشايف كيضربو فيها سنوات كتبانليهم أحلامهم تردمات في السلم الوظيفي والضرائب وسقف الترقيات، كيستقلوا ويخرجو يديرو يوتوب والإيكوميرس والدروب شيبينك وكاع الأنشطة لي فيها الصرف وبعيدة على الدولة، واخا مافيهاش نغس حماية الدولة من تقلبات الزمان ونفس الضمانات بحال الكريديات والفيزات، الدراري كيديرو من هادشي مناقص ويخرجو يقلبو على راسهم حسن من ديك فين ماتلقى الدولة شي مية درهم ناقصة في الخزينة تقسمها ضريبة على الموظفين يخلصوها.
تقريبا أغلب الأعمال الحرة في المغرب بداها من مول الديطاي حتى لمول مصحة إما مكيخلصوش الضريبة إما كيتحايلو عليها ومكيخلصوهاش كما يجب إلا قلة قليلة سواء بالتزيار ومعرفوش كيفاش أو عندهم ضمير وطني، دابا مثلا تبغي تشري غير دار خاصك تبقى تقلب على شي واحد كيديكلاري بالثمن كامل، لدرجة أن البعض كيديروها في الإعلان ديال البيع كأنها ميزة ومعاملة خاصة وإستثناء، حيت كولشي باغي يخلص الضريبة ناقصة ويهرف على الدولة واخا غير فألف درهم ومايمشيش بلاش، عضة في الفكرون والا يمشي فالت، هادي هي علاقة المواطن مع الدولة، بالإظافة إلى أن الضريبة كيحس بيها المواطن بحال كريساج قانوني من كيان صح منو لي هو الدولة، مع الإيهام بلي الضريبة كترجع ليه على شكل خدمات لي في الغالب المواطن كيعتابرها غير فلوس كتفرق ياكلوها الفاسدين، وأنه كيخلص ضريبة غالية في المقابل الخدمات العمومية حالتها.
صناع المحتوى في الأنترنيت كاين منهم لي دار لاباس بوالو، وكاين لي خسر فلوس كثيرة وماصور والو، وكاين لي الهدف ديالو توعوي تعليمي كيخسر من جيبو وماشي الغرض ديالو الربح، وكاين لي دايرو كهواية ومشاركة مع الناس، غير هو راه كاين بزاف غير بالسبان والمعيور والفضايح دارو لاباس بلا مايخلصو حتى درهم ديال الضريبة للدولة على غرار خوتهم الموظفين لي كتقطع ليهم الضريبة من المصدر، راه من الأسس ديال التقدم والإزدهار هو العدالة الضريبية كولشي يخلص الضريبة على قدم المساواة، ماشي موظف كيخلص الضريبة وهو خدام ويخلصها وهو متقاعد وواحد النهار وماطال ناشرهم في يوتوب غير من الصالون أو من الكوزينة مدخل لملاين وممخلص حتى ريال ويتشكى حتى هو، خاص شوية ديال العدالة لي ماغاديش تحقق غلا بتعميم الضريبة على كولشي.