ظاهرة جنوح القاصرين ولات خطر حقيقي كيهدد الأمن ديال المواطنين ومستقبل البلاد

—
ملي كنت كنجي من المدرسة وكندير شي سلوك فيه قلة الترابي والآداب والإحترام ، ملي كتغوت عليا ماما ديما كانت كتقول نتومة آش كيعلموكم فهاد المدرسة ، وكبرت شوية وهي مازال كتطرح نفس هاد التسائل فكل مرة ، وعيت باغي نفهمها أن المدرسة كنقراو فيها م والترابي راه شوية من الدار وبزاف كنلقطوه من الزنقة ، وطبعا مكانتش متيقة أن المدرسة عندها فقط هاد الدور الصغير ، حيث بالنسبة ليها المدرسة خاص تربي ليها الدري وتقريه وتعلمو ، وهي غير توكلو وتشربوا وتصبن ليه ، يكفي أنها بدلات مجهود باش توفرليه أدوات الدراسة فراه خاص المدرسة تكلف بيه ، وتردو ليها مقاد حسن من لي سيفطاتو .
الموشكيل هو العديد من الأباء البسطاء كيفكرو بهاد المنطق ، وحيث أعباء الحياة عندهم كثيرة فالمدرسة بالنسبة ليهم واحد المؤسسة كتكفل ليهم بتربية ولادهم وكيرميو كاع الحمل عليها ، لدرجة ملي كيدير الطفل شي سلوك خايب فالدار ، أول حاجة كيسمع هي واش هادشي لي كيعلموكم فالمدرسة ، وطبعا حيث المدرسة مكتربيش ، فراه الطفل كتربيه الزنقة ، والنتيجة هي هاد ظاهرة جنوح القاصرين لي ولات خطر حقيقي كيهدد الأمن ديال المواطنين فالمغرب ، وكلنا مؤخرا شفنا فيديوات لمراهقين وأطفال كيحتافلو بعيشورا بطريقة خطيرة جدا ، وكيتعداو على الناس فالشارع ، والتشيار بالبيض على البنات ، والبنوات محروقين والدخاخن طالعة فكاع الأحيائ الشعبية بحال الى فشي حرب ، وعاد الغزوات الجنسية لي كيديرو من تحرش وتلواط على أي حاجة دايزة واعتداء على البشر والحيوانات والجماد ، ببساطة جيل سايب بلا قيم بلا ظوابط بلا أخلاق .
وهادشي طبعا عندو عدة أسباب ومن بينها عدم تحمل الأسرة تربية ولادها ، وبصح مكاين غير ولد وطلق بحال الى كيحاربو بيهم الملل ، والمدرسة مكيوصلهاش الطفل عندو حتى القواعد الأساسية ديال السلوك المتحضر ، هادشي فحالة لقيتي طاقم المؤسسة مآمن بهاد السلوكات الحضارية ، لذا المؤسسة ماغاديش تعاود تربيه وتقريه من الفوق مادام أن الأسرة تخلات على دورها الأساسي ولاحت المسؤولية على الدولة ومؤسساتها ، فمن غير المدرسة كيبقى الطريق سالك نحو الحبس لي كيزيد يرد القاصر مجرم كثر ، والنتيجة راه كنعيشوها وقريب يولي حظر التجول فعدة مناطق غير بسباب البراهش .