مريم الزعيمي ل"كود": ها كيفاش تولدات "الفيشطا" وما كنآمنش بشي رسالة فالفن والمسرحية عمل فني استعراضي

مريم الزعيمي لعبات مزيان فدور زروالة فمسرحية "الفيشطا" اللي تعرضات لخميس 30 نونبر بالرباط والجمعة 1 دجنبر 2023 فكازا.
الزعيمي نجحات فالاداء. نجحات فالاغاني. نجحات فالرقص. لعبات بصوتها بجسدها. تماهات مع زروالة الشيخة العارفة بالعيوط. زروالة اللي جات تنقد رجالة قبيلتها غادية تلعب حتى بالباشا =لعب الدور فريد الركراكي=. سحراتو ورونات كيانو ولعبات بيه.
الفنانة هدرات ل"كود" بعد العرض الاول فمسرح محمد الخامس لخميس اللي فات٬ على ميلاد "الفيشطا". الفنانة قالت ل"كود" باللي "فكرة المسرحية جات من رغبة في الاشتغال مع صديقنا المخرج امين ناسور. كما اوضحت ل"كود" باللي "الخدمة كانت مشتركة" يعني كلشي شارك فاخراج هاد العمل للوجود. "كانت عندنا رغبة كبيرة فالاشتغال مع ناسور٬ لانو كيتعتابر من المخرجين الشباب للي كيوصل الفن بطريقة متميزة جدا"
ثم اوضحت الفنانة فحوارها مع "كود" باللي بعد الفكرة دار "مختبر للكتابة" وبعدها كان "مختبر دلموسيقى واخر ديال التداريب" واضافت "بقينا غاديين وكنطورو فالعمل حتى وصلنا للنتيجة للي وصلنا ليها اليوم وشركناها معاكم"
بخصوص رسالة هاد "الفيشطا" تومن الزعيمي باللي الفن ما خاصوش يكون عندو رسائل "انا ما كانآمنش بفكرة دالرسائل فالفن. كاين يمكن لينا نركزو على امور فالمجتمع. لكن كان عندنا اختيار اخر" تشرح ل"كود" الفنانة الزعيمي.
المسرحية واضحة كيفاش كتشوف الامور "هدف هاد العمل ماشي نوصلو شي رسالة كثر من انو نقدمو عمل استعراضي فني كيجمع اشكال فنية. عمل يخلينا٬ كممثلات وممثلين٬ نخدمو مهاراتنا. يعطينا فرصة نطورو صوتنا وتحركات جسدنا ومهاراتنا فالتمثيل" ثم اضافت ل"كود" "هادي هي فكرة المسرحية"
تفاعل الجمهور مع العرض عتابراتو الزعيمي٬ فحوارها مع "كود"٬ بين باللي الرسالة وصلات. كان "شيق جدا" وعجب الفنانات والفنانين اللي وجدو ولعبو وخرجو وساهمو ف"الفيشطا". الزعيمي تفاجئات بالاستقبال لكبير "ما كناش متوقعين هاد الناس كاملين يحضرو. جاو ناس كثار اللي كيبغيونا ويحبونا تفاعلو معانا بطريقة زوينة. كان تجاوب كبير لا من جيهة الجمهور لا من جيهتنا".