علاش البام ما يقتاديش بالمنصوري اللي خسرات فمراكش فالبلدية قررات تمشي للمعارضة: علاش ما يخرجش ببيان يقول انا فالمعارضة حقاش البي جي دي هو اللي بغاوه لمغاربة

حزب الاصالة والمعاصرة خاصو يقتدي بفاطمة الزهراء المنصوري. عمدة مراكش السابقة ولما جاء حزب العدالة والتنمية اولا في مراكش في الانتخابات البلدية 2015 اعلنت في تصريح ل"كود" حينها "انا غادية للمعارضة. قالتها واخا ما كانش عند العدالة والتنمية الاغلبية المطلقة واخا شي وحدين بغاو يزيدوها وكانت عندها فرصة باش ترجع للعمودية. خروب بلادنا عارفينو وعارفين كيفاش تولي رئيس مجلس بلدي واخا يكون عندك اصوات قليلة. السيدة كانت ديموقراطية واعترفات بالهزيمة ومشات للمعارضة.
حقاش حزب الاصالة والمعاصرة ما يقتاديش بيها ويرجعها قدوة وغادي يعطي درس كبير في الديموقراطية. الحزب ما اختاروش لمغاربة الاول. المغاربة صوتو على العدالة والتنمية اللي جاب 125 مقعدا ومن بعدو جات الاصالة والمعاصرة ب103. الفرق واضح. بعد اعلان النتائج كان الحزب يقول فبيان للمغاربة. اخترت المعارضة وساشكل حكومة ظل. هاد الممارسة غادية ترقي العمل السياسي. هو دار بيان غريب. كيكول حققنا فوز سياسي ولا تحالف الا مع من نتقاسم معهم المرجعيات. وراك ما جيتيش الاول علاش كتيكول لا تحالف الا مع من نتقاسم معهم المرجعيات. راه العدالة والتنمية هو الاول.
لو انه تصرف واختار المعارضة كان غادي يكبر بزاف فعينين لمغاربة. دابا كاينين قياديين كيهددو بالفصل 47 اللي كيعطي للملك الحق فتعيين رئيس حكومة من الحزب الفائز وكاينين اللي باغيين يبدلو هاد الفصل. يعني لحد الان واخا الملك كان ديموقراطي بزاف وماشي غير عين من الحزب الاول اللي هو العدالة والتنمية بل عين امينو العام. هادي واعرة بزاف وكتبين شحال هو ديموقراطي. دابا علاش الاحزاب ما تفهمش الرسالة وتكول واش بغات المعارضة ولا الحكومة. غادية تسهل الخدمة لكلشي.
دابا هاد الوضع غريب عندنا. وغادي يزكي نظرية المؤامرة وغادي يربح منو حزب العدالة والتنمية نقاط اخرى. يا احزاب ما تسناوش الاشارات اللي باغي الحكومة يقولها واللي باغي المعارضة يمشي ليها. داك الشي ديال التجمع الوطني للاحرار والعرض ديال بنكيران راه حتى واحد ما مصدقو حتى ناس التجمع الوطني للاحرار. لعبة اخرى بليدة كتشبه ديك اللعبة ديال المسيرة الفضيحج اللي دارت فكازا.
دابا ايلى كان من غير حكومة ديال العدالة والتنمية وتشكل في القريب العاجل راه خاص الانتخابات تعاود ماشي تعطى للحزب الثاني حقاش لمغاربة صوتو واختارو واحتارمو اختيارهم وباراكا من القوالب