علاش يتشد الوجدي والناصري ويتطلق البركاني. القاسم المشترك: الطونوبيلات والمخدرات والمسطرة المرجعية

سهروا الناس البارح باش يعرفو نتائج التقديم ديال الوجدي رئيس جهة الشرق وباقي المتهمين اللي معاه، الفيلم معاود، حيث قبل شي خمسة أشهر كان واحد الملف آخر، حتى هو فيه مسطرة مرجعية، ديال سي بوجمعة لي شدوه البوليس دكازا عندوا سبعة كيلو ديال الكوكايين، ومنين بحثوا معاه جبد واحد البرلماني بركاني، ولكن الفرق أن البركاني نجا من المسطرة، رغم أن سي بوجمعة، الله يذكرو بخير، حدد معطيات خطيرة واجتماعات ديال تهريب المخدرات، وهي اللي كانت سباب فاعتقال واحد المسؤول رياضي كينشط في الريف.
دابا هاد 25 واحد، اللي جرهم طليق الفنانة لطيفة رأفت وايسكوبار افريقيا، وفضح كيفاش كانوا قبل 10 سنين مشاركين معاه في الاتجار الدولي في المخدرات، واش كلهم متورطين، القضية في يد قاضي التحقيق هو اللي غادي يدير معاهم التحقيق التفصيلي، ويدقق في التهم الموجهة لكل واحد، لأن المتهم تيبقى بريء حتى تثبت إدانته، وحنا مغاديش نبرؤوا حتى واحد، ولكن مافيها باس، نتساءلو على ملف البركاني، اللي حتى هو برلماني ومسؤول في مجلس كبير ومهم وقيادي استقلالي بعد ما هرب من البام، وعلى صاحبو مول الطوموبيلات كلاس تاع الكراء، اللي خربها على الشركات وشد كاع الصفقات تاع البرلمان والسفارات، وكان قبل ذلك موضوع شكاية مشات لوزير النقل حول الأسعار باش خدام وكيفاش تيطيح السوق، حيث أي شركة متقدرتش تنافسو إلا إلى كانت تتاجيها شي فلوس كحلة ولا تستغل الطوموبيلات في شي حاجة أخرى.
دابا هاد المالي صرح بلي شي طوموبيلات كاط كاط تيجيبو الحشيش من كتامة، وتيديوه للحدود الشرقية، وكيف تنعرفو جميع العمليات تاع تهريب المخدرات دوليا تتعتامد على سيارات فارهة، وهذا هو القاسم المشترك بين بوجمعة صاحب البركاني والمالي صاحب الوجدي، غير الفرق أن الوجدي دخل والبركاني تزكل، وصاحبو مول الطوموبيلات حتى هو تزكل.