عاينات كود هاد الصباح فطريق دار بوعزة، ورش لبناء مشروع كبير يتعلق بناء شي مشروع سياحي، وبعض عناصر السلطة المحلية بداخله، حقا قال ليك شي مخالفة في البناء. كود سولات على القضية وقالو لينا بلي القايد الجديد، واقف برجليه على المخالفات، ولكن فين كانت السلطة المحلية حتى وصل هادشي لشارع رئيسي وعلى عينك يا بن عدي وبلا تعليق رقم الرخصة. كود جابت الحقيقة، بعد استفسار مجموعة دالجهات، حتى مالين اللبن وصيكوك عارفين الحقيقة، وتبين أن الأمر يتعلق ببناء عشوائي لمشروع ساهمات فيه جماعة دار بوعزة، بشي رخص ماتاخدهمش ولو تكون في تانزاينا مع احترامنا لهاد الدولة، رخصة إصلاح جوج هنكارات فلاحيين، تحولات إلى رخصة بناء مطعم وقاعة ألعاب وتزيين مساحة كبيرة حديقة وأخرى موقف للسيارات، هادشي بلا خبار مدير الوكالة الحضرية المسؤولة على التصاميم. دابا اللي شاف هاد المشروع اللي تبازا على رخصة إصلاح مفبركة، وشاف المول تاع القباج اللي مرخصة التصاميم تاعوا ومحطوطة الموديفيكاسيون، وتعرضت للإيقاف ديال الورش والهدم وغير ذلك، لدرجة أنه ولى معلمة مشوهة الطريق، وشاف هاد الروينة لي فطريق أزمور حدا المدارة ديال ماكدونالد، يطرح تساؤلات على طريقة تدخل السلطات تاع آنفا، ونظيرتها تاع النواصر، رغم أن هنا كاين عامل ولهيه كاين عامل. المهم الخبار اللي جمعاتها كود تتقول بلي شي واحد عندو مطاعم تاع واحد الماركة ديال محطات الوقود في النواصر ودار بوعزة، هوا اللي تيبني المشروع العشوائي، حيث كيفاش تصاميم تاع جوج مستودعات ديال الفلاحة، تتحول في رمش عين لريسطورات وتستقبل الأسر. طريقة منح الرخص وغض الطرف خاص تتدخل فيها النيابة العامة ووزارة الداخلية، حيث منحكروش على البرارك تريبوهم ونسمحوا بخرق تصاميم التهيئة، واه الأرض ما مجزءاش، يعني ماشي تجزئة ومافيهاش الواد الحار تولي مطعم، والسيبة هادي. شي مصادر قالت بلي الموظفين تاع الجماعة وتاع العمالة تيتغداو ويتعشاو في الريسطورات تاع مول هاد المشروع، ومن بينهم مهندس تاع العمالة، وشي مسؤول في قسم التعمير عندو شهادة تاع الفقه الإسلامي ولا الشريعة، تايشوفوه يوميا في المشروع وفي شي مطعم في بوسكورة تاع مول هاد البناء. إذن كلشي واكل باش يميك. دابا اللي بغينا نعرفوا كيفاش السلطات خلات هادشي حتى وصل لهاد الدرجة، واش القانون غايتطبق على رئيس الجماعة والموظفين المتورطين في هاد الشيء، سواء كانوا موظفين جماعيين ولا ديال العمالة، خصوصا أن جماعة دار بوعزة فاحت منها روائح كثيرة.
