كاينة الدعششة.. و لكن العروبي راه تاهوا بخبيزتو

فاش شفت الفيديو ديال الرباعة ديال الحمير للي ڭريساو دوك الجوج فجمعة سحيم حيث حصلوهم غادين يديرو فيه فرمضان، حتى أنا تخلعت كباقي الفيسبوكيين من هاد المتدعششين للي باغين يدخلو فمؤخرة بنادم بالعنف. و لكن فاش شفت كمامرهم و صنادلهم المغبرين و فامهم للي مكيتسدوش بكثرة السنان المخزين، فكروني فالطرف ديال عائلتي للي باقي ساكن فالعروبية فجوايه برشيد. و دابا الاستنتاج ديالي هو أن هاداك الڭريساج ما عندوش علاقة كبيرة مع الدين، و لكن مع النيك و العيالات و لقاو رمضان سبة باش يفرڭعو عقدههم. كون كانت القضية فيها غير واحد ناصب ڭاميلة فرمضان، كانو غادين يڭولو “لا حول و لا قوة لا بالله” و يجرو بهايمهم و يسرحو بيهم فشي قنت آخر، و لكن للي خربق ليهم دماغهم هو وجود ديك البنت.
المدينيين عندهم واحد الصورة نمطية على العروبي للي روجوها الداسوكين و عبد الخالق فهيد و صحابهم فسيتكومات كتضحكهم غير هوما. كيصحاب ليهم العروبي كائن ساذج غير كياكل و كيخرا و كينعس و مرا مرا كينيك مراتو و لا شي عاملة جنس فاش كتطيح الكانزة ولا كيبيع ڭاع كوربات البطاطا للي عندو. كيضنو بللي مكلخ و معندوش صوت داخلي و تا حاجة ما كتجعرو و كيحتارم المرا فوق المعدل الوطني حيث عندو ثقافة الشيخات. إلى بغيتي تعرف العروبي ديال بالصح كيداير، خرج من المدينة و سير عندو للموطن الطبيعي ديالو للي تيسميوه المغرب العميق، سير عندو لجمعة سحيم و جقمة وولاد حريز، و غادي تلقى باللي دينمو كائن عنيف بطبعو.
العروبي ما كيحملش المرا. خلينا من ديك الهضرة ديال المساوات فالإرث و الخلاص ڭد ڭد، هاد الحسابات ما كتطيحش ليه أصلا فراسو. العروبي دم سنانو هوما العيالات و مكيحملش فيهم الشعرة، راه ماشي غير جا و اختارع مقولة “مراتي حشاك”. كيفرح مني مرتو كتجيب ليه الولد حيث كيشوف البنات كشوهات مستقبلية غير تيبلغو تيجيبو الكرش من الزنقة. مكيشوفش المرا كإنسان، و لكن كترمة متحركة، تيفرض على بنتو تلبس السروال و الصاية زعما باش توقرو و لكن فالحقيقة راه حيث خايف يقيم عليها. و إلى خلاها تخدم باش تفك منو شوية، تيبقى حياتو كاملة و هو تيفتخ فيها و يعطي لولدو كعقاب ليها، و إلى دوات كيفكرها بللي كان فيه ما يدخلهاش للمدرسة أصلا و خاصها تبوس ليه اليدين و الرجلين. و عندو هوس هستيري بالجنس و كيحط اللومة على المرا، ما خاصها تدير حتى شي حاجة كتبطل ليه الوضوء و ديك الشي علاش دوك الكمامر بداو بالدرية هيا اللولة و هرسو ليها النيف.
هاد القوم ما عندوش أصلا كي يدعشش حيث بكل بساطة ما قاريش، كيعرفو فالدين غير الله و النبي فاش كيحلفو بيهم فوڭ البزيزيلة. حتى القرآن ماكيقشبلو فيه والو، فاش كيضربو الصداق راه ماتيقراوش سورة الفاتحة، تيعرضو “الحمدو”. داك الفيديو تيصدم بحكم شنو طاري فالعالم حاليا و التطرف تيخلع، و لكن هادو راه ديما كانو بحال ما هوك. مني كنت صغيرة وانا كنسمع قصص ديال بنات العروبية هربو من الموت حيث لقاوهم كيتموحشو ورا الضرڭ مع صحابهم، و عائلاتهم كيتخباو ورا مبرر الدين و التقاليد. لا سمحو ليا، صحراوى و الشلوح محافظين كثر منكم و مكتسمعش عليهم بحال الخماج، الديفو فالجينات و لا فالما للي كتسڭيو. بحال هاد الڭنوس هما للي مخلينا واحلين فالعصر الحجري حيث كيخليو الغرائز ديالهم يڭودوهم بحال الحيوانات.