الركراكي: الاندية كيتفاوضو معنا على اللاعبين ديالهم ومازال ما حسمنا وظلمت لاعبين ما عيطتش لهم

اكد الناخب الوطني وليد الركراكي ان مصلحة المنتخب الوطني المغربي اهم وقبل من مصلحة الاندية اللي كتفاوض الجامعة الملكية المغربية لكرة القدم باش يبقاو شي لاعبين يلعبو معها فالأيام الاولى من شهر يناير الجاي، وأعترف بلي ظلم شي لاعبين حيث ما عيطش لهم يشاركو فكوب دافريك فالكوت ديفوار ولكن هذه هي الاختيارات.
وتحدث الناخب الوطني وليد الركراكي فالندوة الصحافية اللي علن فيها اليوم الخميس على ال 27 لاعب اللي غيشاركو فكوب دافريك فالكوت ديفوار وقال: "كاينين بزاف ديال الاندية باغيين لاعبين المنتخب يلعبو معهم يوم 2 و 3 و 4 يناير، وهما ما كرهوش كوب دافريك يبقاو معاهم وما يجيوش معنا بالحق حنا عندنا بطولة خاصنا نوجدو لها واللاعبين عارفين هادشي وعندنا تاريخ الفيفا هي 1 جونفيي يعني عدنا الحق ديالنا ما نطلق حتى واحد يلعب مع الفريق ديالو ومازالين هما كينيگوسيور معنا وغنشوق مي دابا ما نقدرش نگوليك شنو كاين، ولكن حقنا هو لو 1 جونفيي وحنا اللي نقدر نقولو اه او لا ماشي الاندية، مي كنشوفو من جهة اخرى باش علقتنا ما تضررش مع الاندية".
وكمل وليد الركراكي: "واش ظلمت شي حد يستاهل يكون فالمنتخب وما عيطتش له ؟ اه 100% ظلمت شي واحد، راه الكورة هي الظلم ديما كيحس الواحد مظلوم وكيحس الجمهور ان اللاعب ديالو مظلوم، أنا ولدي كيحس براسو مظلوم ملي ما كنخلصش له السبرديلة، ولكن أنا مخلص وجابوني هنا باش ندير ليشوا وهادي المسؤولية ديالي، وبطبيعة الحال كانوا شي لاعبين يقدرو يكونو وماشي على الكورة ولكن هادوكيبقاو تفاصيل صغار، وفالأخير راه النتائج اللي كتحكم".