الركراكي: هذا الشي ديال وكلاء اللاعبين والسماسرية كيفرضو عليا لاعبين ديالهم ما كاينش

أكد الناخب الوطني وليد الركراكي أن كلشي داكشي اللي كيروج حول وكلاء اللاعبين وتأثيرهم على الاختيارات ديالو فالمنتخب الوطني المغربي وفرضهم لاعبين عليه ماشي صحيح، وعمرو ما كان وما غيكونش.
وتحدث الناخب الوطني خلال الندوة الصحافية للإعلان على اللاعبين اللي غيجيو لماتش إريتريا وتنزانيا، وقال: "ليزاجون بغيتو ولا ما بغيتوش كيبقاو وكلاء ديال اللاعبين راه إذا بغيتي تتواصل مع شي لاعب دابا خاصك تعيط المنادجر ديالو وهاد الشي كان قبل مني ومع أي فريق فالعالم كتدوز من هاد الشي راه باش تهضر مع كريستيانو رونالدو خاصك تهضر من قبل مع الوكيل ديالو جورج مينديز هادي هي القاعدة".
وكمل وليد الركراكي: "دابا ما نقدرش نهضر على اللي قبل مني ولا اللي جايين من ورايا.. كندير لاليسيت ديالي وكنشوف شكون اللاعب اللي يصلاح ليا وكنخدم باش نعيط له، أما داكشي ديال شي أجون يجيب لاعب ديالو راه إما ما كتعرفونيش او ما كتعرفوش كيفاش كنفكر.. كنعرف وكلاء لاعبين حيث لعبت الكورة وعندي علاقات بوكلاء لاعبين ولكن باش يجي شي وكيل لاعبين يقولي عيط ليا للاعب ديالي راه عمرها ما كانت وما غاديش تكون وعمرها ما غتكون".