خربوشة ممنوعة من الأعراس والحفلات في الداخل والخارج. كيفاش دنيا باطما احتاقرات القضاء بعد قرار "النقض" وخرقات قانون السير فتحدي غبي

بعد قرار محكمة النقض الرافض لطعنها ول البارح لخميس 28 دجنبر 2023 كان رد دنيا باطما "غبي". فيه تحدي خاوي. نشرات ستوري بلبستها الصفرا فالدار مع اغنية ديال هيفا وفالطونوبيل كتسوگ وعينيها ماشي على الڤولو٬ كتشوف فالكاميرا. كيعني ما مسوقاش للقضاء وكتخرق قانون السير بتصرفها فالسياقة.
باطما من لخميس يقدرو البوليس يدخلو للعرس ويشدو اللي ركبات على العيطة وخرجات "خربوشة". دابا ملي تكون كتغني "فين الشأن والمرشان..شحال غيرتي من عباد...بلا شفقة بلارحمة"، حيث هاد الكلمات تترجم التهم اللي توجهات لدنيا بطمة، التشهير بالأشخاص على الدعامات الإلكترونية. دابا ملي ولا الحكم نهائي ميا في الميا، بعد ما رفضات محكمة النقض الطعن اللي قدمو المحامي تاعها باش يتراجع الحكم، ولات دنيا أمام أمرين، إما تقدم راسها وتطلب تنفذ العقوبة ولا تتسنى حتى يجيو ليها للدار ولا أي عرس منشطاه
المصيبة أن قرار إلقاء القبض لتنفيذ العقوبة، ما غيعطيهاش الوقت باش تبدل القفطان ولا اللبسة الأنيقة اللي لابسهاها في السهرة، للا. من تما للسجن، مباشرة، حيث هاد الاعتقال مافيهش الحراسة النظرية ولا البحث ولا والو، فيه إلقاء القبض في أي بلاصة لقاو فيها المقصود، وترحيله إلى السجن.
دابا دنيا على هاد الحساب غاتحضي راسها، وبالتالي ممنوع عليها تمشي تنشط الأعراس والحفلات ولا تحضر شي برنامج تلفزيوني معا رشيد شو، حيث يقدرو يتسناوها البوليس ولا الجدارمية حتى تكمل ويديوها، هذا إيلى تاقاو فيها وجه الله، حيث يقدرو كاع يوقفوها وهي تتغني وينزلوها من المنصة.
ماشي دابا غير الحفلات في المغرب حتى في الخارج ولات ممنوعة، حيث سميتها غتولي في الكمبيوتر ديال شرطة الحدود وغتطلع في اللائحة الحمراء، سواء فالمطار سوى فالمرسى، ومن تما ثاني يديوها للحبس، حيث مطلوبة لتنفيذ العقوبة.