البطولة ولات بلا جمهور وحتى حد ما عارف علاش امام سكوت العصبة والسلطات.. وماتش تطوان والوداد حتى هو بلا مشجعين

صدر من جديد قرار بمنع حضور الجمهور لماتش من ماتشات البطولة الاحترافية لكرة القدم، وهذه المرة كيتعلق الأمر بمباراة المغرب التطواني والضيف ديالو الوداد الرياضي برسم الدورة 15.
وحسب إدارة المغرب التطواني، تقرر إجراء ماتش الدورة 15 من البطولة الإحترافية بين الفريق والوداد الرياضي يوم الاحد 07 يناير 2024 بملعب سانية الرمل بداية من الساعة السادسة (18:00) مساءا بدون جمهور.
واكدت ادارة المغرب التطواني ان منع الجمهور من حضور ماتش الفريق والوداد الرياضي، جا بناءا على قرار السلطات المحلية لمدينة تطوان.
وصبح مؤخرا منع الجمهور من حضور ماتشات البطولة الاحترافية لكرة القدم، شي حاجة مألوفة عند متتبعي الكورة الاحترافية، وسط السكوت ديال العصبة الاحترافية وحتى السلطات والمسؤولين، فبلاصة ما يخرجو يشرحو شنو أسباب منع المشجعين من متابعة الماتشات تفاديا لأي تأويلات واشاعات تقدر تسيء لصورة المملكة المغربية.
ودابا صبح ضروري يصدر من العصبة الإحترافية أو المسؤولين ولو غير بلاغ، يفسرو و فيه شنو هي الدوافع والأسباب لقرار منع الجمهور من حضور الماتشات، خصوصا وأن المغرب وكاع المدن ديالو فيها الأمن والأمان.