ماتشات البطولة غيرجعو والعصبة حددت امتى وفين وكاين الويكلو

غيرجعو ماتشات البطولة الاحترافية لكرة القدم الويكاند الجاي بإجراء الدور 7 و 8، بعدما توقفو لجوج ديال السيمانات، بسبب الماتشات الدولية وإصلاح كازو عدد من تيرانات الاندية ومشاركة الوداد فالسوبر ليك الأفريقي.
وحددت العصبة الوطنية لكرة القدم الاحترافية، يوم الجمعة 27 أكتوبر 2023، كموعد لعودة ماتشات البطولة من خلال الدورة 7، وغتلعب حتى الاحد 29 أكتوبر.
ومن بين الماتشات المهمة ديال الدورة 7، كاين ماتش الرجاء الرياضي اللي غيكون ضيف عند اولمبيك اسفي يوم السبت 28 اكتوبر مع 6 وربع ديال العشية، وغيتلعب الماتش ويكلو بلا جمهور.
وكاين ماتش المتصدر نهضة بركان اللي غيكون ضيف على المغرب الفاسي يوم الاحد 28 اكتوبر، مع 8 ونص ديال الليل فالتيران الكبير لفاس وحتى هو غيكون ويكلو بلا جمهور.
أما ماتش الوداد الرياضي وفريق مولودية وجدة تقرر يتلعب فمركب محمد الخامس بالدار البيضاء، ولكن مازال ما تحدد التاريخ ديالو، بسبب التزامات الواك بالمشاركة فالمسابقات الأفريقية.
وبالنسبة للدورة 8 من البطولة الاحترافية، غتلعب ما بين الجمعة 3 نونبر والاحد 5 من نفس الشهر، ومن اهم الماتشات ديالها مواجهة المتصدر نهضة بركان مع حسنية اكادير يوم السبت 4 نونبر مع 6 وربع ديال العشية، فبركان.
وكاين ماتش الرجاء والفتح الرياضي يوم الاحد 5 نونبر مع 8 ونص ديال الليل فمركب محمد الخامس بالدار البيضاء وغيكون ويكلو بلا جمهور.
وبالنسبة لماتش الوداد الرياضي والمضيف ديالو اتحاد التواركة، تقرر يتلعب فتيران مولاي الحسن فالرباط، ولكن مازال ما تحدد الموعد ديال الماتش بسبب التزام الوداد بالسوبر ليك الأفريقي.