شركة جرات على الخدامة غير بالفن.. نقلات المقر ديالها من المدينة لدوار صغير فالجبل

تاهمو بزاف ديال العمال في الشينوا الشركة لي كانو خدامين فيها أنها نقلات المقر ديالها للعروبية ف جبل باش تجبرهم على تقديم الاستقالة ديالهم.
الشركة لي كتخدم فمجال الإعلانات والإشهار، وباش تتخلص من العمال ديالها بلا متعطيهم تعويضات، دارت واحد الحل ديال الحرايمية، وهو أنها نقلات المقر ديالها من المدنية لواحد البلاصة فالجبل.
هاد البلاصة صعيب ليها التنقل وقليل فيها الترونسبور وبعيدة على المدينة، وهو شي لي خلا بزاف ديال الخدامة يقدمو الاستقالة ديالهم.
المقر الجديد ديال الشركة داروه فجبال تشينلينغ، وهي منطقة عالية بزاف، وخاص الكار لي كيوصل ليها يضرب 3 كلم غير وهو طالع فالجبال.
والمصيبة الكبيرة هو أنه من غير الكار مكينينش ما كاين لا طاكسيات لا والو.
هاد الخدعة ديال الشركة بان أنها خدمات ليها، حيت 14 من أصل 20 خدام لي كاين ف الشركة قدمو الاستقالة ديالهم.