واش كاينة عنصرية فكلام الركراكي مع مبيمبا . مدرب الاسود: ما قلتش شي كلمة عنصرية ضدو وتصريحو نيتو ناقصة. لاعب الكونگو: ما محتاجش نفرش وعندي الفيديو

هاد الفيلم اللي وقع بعد ماتش المغرب والكونغو ما غاديش يسالي. لمضاربة اللي وقعات بين مدافع الكونغو مبيمبا ووليد الركراكي بعد الماتش اللي سالى فسان بيدرو بالكوت ديفوار بواحد لواحد دايرة بحال شي مسلسل. حلقاتو ما سالاتش بعد الماتش. الاتحاد الافريقي فتح تحقيق وغادي يخرج عقوبات ضد كل لعاب او مدرب او مسؤول تورط. هاد الشي حدد ليه تاريخ قبل الماتش الثالث للمنتخبين عن المجموعة السادسة٬ اي قبل لاربعا 24 فبراير.
الركراكي خرج بتصريح ففرانسا. حقاش فهاد الدولة كمل المسلسل. اللعاب الكونغولي مبيمبا اللي كيلعب فمارسيليا مع اوناحي وحاريث٬ كان لمح ف"زون ميكس" باللي مدرب الاسود عايرو معيورة عنصرية. هاد الشي تفهم من جوابو باش قال "عندي الفيديو كامل اللي تقطع فالتلفزيون. ما غاديش نخرجو. خديت وقتي نشكر الله. غادي نبقى ساكت. الله ياخد الحق".
الركراكي خرج رد عليه ف"ليكيب" الفرنسية. قال باللي نيبتو خايبة باش لمح مبيمبا لمح لشي كلام عنصري قلتو ليه. واضاف مدرب الاسود باللي اللعاب الكونغولي "هضر عليا بطريقة خايبة انا و المساعد ديالي قبل نهاية المباراة وباللي المدرب ديالو عارف هادشي" واوضح "واخا هاكاك مشيت باش نسلم عليه غير هو ما بغاش وقال لي باللي انا متصنع وقال باللي قلت عليه غبي"
الركراكي اضاف ل"ليكيب" "ايلى كان مبيمبا كيهدر على الدين٬ اتمنى يكون صادق مع راسو ولا عندو شي حاجة يوريها لينا كاملين. متأكد ما قلت حتى شي كلمة عنصرية ضدو"