خاليلوزيتش: الحكومة تدخلات باش ترجع لعابا حيدتهم من المنتخب المغربي

لمح الناخب الوطني السابق وحيد خاليلوزيتش بلي الحكومة كان لها دور فقرار الاقالة ديالو من تدريب المنتخب الوطني المغربي قبل 3 أشهر من كأس قطر 2022، ومن بعدما كان هو اللي أهل الأسود البطولة.
الناخب الوطني السابق تكلم على الظلم اللي كيحس به حيث هو اللي أهل المنتخب الوطني لكأس العالم ولكن ما غاديش يمشي معه وتكلم على الاحساس الصعيب اللي كيحس به بسبب هادشي، حيث هادي هي 3 مرة كيوقع له هاد لبلان، من بعدما جراو عليه من الكوت ديفوار قبل مونديال 2010، ومن الجابون قبل مونديال 2018، واخا هو اللي أهلهم.
وحيد خاليلوزيتش كشف لموقع اتليتيك البريطاني بلي دار خدمة مزيانة مع المنتخب الوطني المغربي فمدة 3 سنين خدم فيها سيليكسيونور ديال المغرب، وباللي قضية إقالتو من المنتخب كبر من الجامعة الملكية المغربية لكرة وداخلة فيها الحكومة.
وقال المدرب البوسني للموقع البريطاني: "خدمت مع المنتخب 3 سنين باش نبني هاذ الفرقة، قدمت بزاف ديال التضحيات وناضو قصاوني، خدمنا مزيان مع منتخب شاب وجديد وحققنا نتائج مزيانة، والجو كان مزيان.. الحكومة بغات تجيب شي لعابا حيدتهم وماعزلتهمش حيث ما منضابطينش وما شاركوش فالإقصائيات، قالوقت اللي المنتخب حقق نتائج مزيانة فعدد 8 الماتشات، ربحنا فيها 7 ديال المرات والنتيجة اللي كانت حايبة هي التعادل 1 ل 1 ضد الكونغو الديمقراطية".
وكيجي هادشي اللي نشر الموقع البريطاني قبل يوم واحد من إنطلاق كأس العالم قطر 2022، واللي مشارك فيها المنتخب الوطني المغربي وغادي يدربو فيها وليد الركراكي فبلاصة وحيد خاليلوزيتش اللي حيدوه قبل 3 أشهر من كأس العالم، مع العلم أن الفترة ديالو حيد فيها عدد من اللعابا من ليكيب ناسيونال فمقدمتهم حكيم زياش لعاب تشيلسي، واللي علن الاعتزال ديالو الدولي وقال بلي عمرو ما غادي يلعب فالمنتخب مادام خاليلوزيتش هو المدرب ديالو، ورجع ملي تحيد المدرب البوسني وتعين الركراكي.