بنمحمود: كنجربو استراتيجيات باش نجيبو الكاس ولعبنا بحال ايلى وليد معانا

رشيد معبودي سان بيدرو و م ع ////
هدر رشيد بنمحمود مساعد مدرب الاسود البارح على تدبير ماتشات بحال ماتش البارح ضد زامبيا اللي تلعب بسان بيدرو بالكوت ديفوار عن اخر ماتشات المجموعة السادسة من هاد الكان. وقال باللي "خاص تدبير هاد النوع من الماتشات بشكل جيد"
بالنسبة ليه "الاهم" هو "نكونو قادرين على ادارة كل ماتش حسب طبيعتها". واضاف باللي المنتخب كيجرب "استراتيجيات باش يجيب الكاس" وباللي "جيل اللعابة اللي كاين اليوم عارف هاد الشي وكيقدر المسؤولية"
بنمحمود اللي عوض الركراكي الموقوف من قبل الكاف 4 ماتشات جوج فيهم موقوفة التنفيد٬ شكر "الجمهور المغربي تنقل حتى لسان بيدرو باش يساند الاسود"
مساعد المدرب قال باللي المنتخب لعب باش يكون الاول فالمجموعة وفنفس الوقت كان خاصو يجرب لعابة جداد". هاد الشي تحقق وكان الاسود يقدرو يماركيو كثر وهاد الشي تأسف عليه بنمحمود "ما قدرناش نسجلو الفرص اللي جاتنا" غير انو اضاف "ولكن ما تماركا علينا حتى بيت"
فماتش المغرب ضد جنوب افريقيا فثمن النهاية قال بنمحمود "غادية تكون منافسة مختالفة. كنتمنى يكونو المهاجمين اكثر فعالية فماتشنا ضد جنوب افريقيا"
وذكر باللي ماتش لثلاث اللي جاي غادي يكون مختالف على اللي لعبوه الاسود ضد نفس المنتخب فالتصفيات المؤهلة للكان. ماتش "غيكون بطموحات جديدة"
وسولوه على غياب الركراكي على البون توش٬ ورد بنمحمود "غياب المدرب ما أثرش علينا. عرفنا قرار التوقيف نهار الماتش. لعبنا بحال ايلى الركراكي معانا. كنحتارمو قرار الكاف وغادي نمارسو حقوقنا لانصاف وليد"