واش بحالها يصلح للتراكتور. بنت الباشا كتهدر على مشاكل لمغاربة وبالفرنساوية وما كيسمعو حد

ها علاش فاطمة الزهراء المنصوري ما تصلاحش تكون أمينة عامة لحزب الجرار الوزيرة بنت الباشا اللي ما كنشوفوها ما كنسمعو عليها غير فالمناسبات و الأعياد ولات صراحة كتفكرنا غير بهاديك عمتك اللي كتجي للعرس مع لحضور حتى للدقيقة تسعين و كتهز الميكرو و تبرك تشكر فالناس اللي جاو بحال إلى هي مولات العرس.
ما كانت معاك فتمارة ما وجدات كعب غزال ماغربلات جنجلان جات حتى لنهار دالعرس و بركات تهلل " سعداتي فرحاتي جوجت ولد خويا" .
دابا السيدة الوزيرة بنت الباشا ولات إختصاصية ديال لغبور حتى للدقيقة تسعين و الظهور فجعة فشي منبر غير متوقع في حلة أنا اللي خدامة على الأوراش الملكية و كاع الناس ناعسين، على نمط داكشي اللي وقع فالزلزال، الوقاية المدنية و الدرك و وزارة التجهيز اللي ضربو تمارة و وحفرو و وجدو الطرقان بالسكات و جات هي حتى للدقيقة تسعين في خرجتها الشهيرة ديال "قال ليكم سيدنا "
خرجة أخرى جديدة غير موفقة، كيف ديما، كانت مع راديو أطلانتيك باللغة الفرنسية للحديث عن دعم السكن للساكنة المتضررة بالزلزل. و هو التردد أصلا ما كيوصلش لهاديك المناطق، دبا واش هاد الوزيرة ساكنة معانا ولا مع فغانا؟
هي أصلا نادرة الظهور مع المنابر الإعلامية و قليلا ما كتواصل مع المواطنين و كتجي للأوراش لكبيرة اللي خاصها تواصل قوي وكتجي تدير باك صاحبي و تعطي التصريحات بشكل إنتقائي؟
الأوراش الكبيرة و هادي بالذات ديال دعم السكن، خاصها الحوار مع اللغة اللي كيفهموها بعدا هادوك المتضررين من الزلزال. كاين فالاذاعات وفالصحف وفالتلفزيون. كلشي الا عند من مشات نهار 25 يناير اللي فات. اواه "اطلتيك راديو" ،عند رشيد لمباركي اللي يالله حطو الكار فبلادنا. حشومة.
شكون اللي كيهمها تعرف السياسات العمومية و آش دارت الحكومة بفلوس الضرائب؟ هو اللي كيهدر لغة ماشي لغة بنت الباشا. و في إطار عمتك اللي جات حتى للدقيقة تسعين أو ولات مولات العرس، السيدة الوزيرة مولات 'قال ليكم سيدنا' ما أسسات حزب ما ناضلات في مجتمع مدني، ما ناضلات على قضية المرأة و حتى معظم مناضلي البام ما عمرهوم ما حضرات معاهم فشي نشاط حزبي لا وطني ولا جهوي واخا غير بالضحك، ما كتواصل معاهم فوقت الحزة و أغلبهم ما عمرها ما جاوباتو فالتلفون إلى وقف عليها، اللهم هاداك التيار ديال صحابها اللي فمراكش، وجاو حتى للدقيقة تسعين يسوقو ليها على أنها بديل وهبي المناسب؟
هادشي ديال عمتك ولات مولات العرس غير بالترويج للإشاعات من نوعية أنا إختياركم الأحسن لأنني مقربة من.......فيه رائحة التاريخ يعيد نفسه.
هاد الفيلم ديال صناعة الأبطال السياسيين الوهميين في اللحظات الأخيرة بناءا على أسطورة أنا الحل ديالكم حيت أنا اللي قريب من القصر دارو إلياس من قبل. و كما قال كارل ماركس التاريخ لا يعيد نفسه مرتين ولكن إن فعل!
فالأولى تكون كارثة و التانية على شكل مهزلة. ودابا تشوفو