ها علاش ديما ضد هاد الانشطة الخاوية بحال سباق الصحراوية. ما كيفيد لمدينة ما كيسوق الا اوطيلات اوعشي والسنوسي وباش ناضت فالداخلة تزاد تأكد باللي هاد الانشطة ما نافعة الا ماليها

دورة هاد السنة من سباق "الصحراوية" اللي بدا اليوم السبت بالداخلة تصادف مع توتر كبير فهاد المدينة الزوينة. نشاط بالاضافة انو ما عندو علاقة بالمدينة ولا ثقافتها ولا روحها٬ فما كيعاونش المغرب فوالو. ماشي كيف كتحاول كل عام تسوقو لشي جهات صاحبتو ليلى اوعشي مولات لوطيلات تماك مع شريكها ادريس السنوسي اللي بجوج عندهم تقريبا 70 بالمائة من الطاقة الاستيعابية للفنادق بالمدينة.
اوعشي كتقول باللي غادي يشارك فهاد النشاط 90 مرا وباللي هاد لعيالات جايبات معاهم رسالة سلام. وسمعو مزيان اش قالت فتصريح لوكالة المغرب العربي للانباء هاد السيدة "نحن في الداخلة، أفضل مكان يمكن للمرء أن يحلم به، لا يسعنا إلا أن نستلهم من نساء المنطقة اللائي يتمتعن بإمكانيات غير عادية بسبب ثراء ثقافتهن وانفتاحهن والتزامهن الجمعوي، ومن هنا جاءت فكرة تسمية هذا السباق ب "ريد الصحراوية"، التي أصبحت الآن علامة تجارية عالمية".
نساء المنطقة كيف سبق لعديدات صرحن ل"كود" فدورات سابقة ما عندهم علاقة بهاد الحدث. نساء الداخلة بعاد على هاد النشاط. كلشي دار بعيد عليهم.
من غير هاد النقطة كاينة نقطة اخرى كيف اشرنا فالبداية وهي ان الداخلة كتعيش وضعية فشي شكل بسبب وفاة لحبيب اغريشي. البارح العائلة دارت البيان 10 كطالب فيه بالكشف عن مصير ولدها المقتول وتقديم كاع المتورطين الى العدالة.
المدينة عرفات احتجاجات بسباب هاد الحادث. لكن اش من علاقة عندو بنشاط بحال الصحراوية؟
طبعا كاينة العلاقة. كثار كانو فالرباط ومدن اخرى هبطو دارو لفلوس فمدن الصحرا من العيون حتى الداخلة ودوز على بوجدور والسمارة. هادو ديما كيقدمو ريوسهم بحال هاد ليلى اوعشي باللي كيعرفو المنطقة وكيساهمو فتنميتها وكيخدمو ناسها وكيلعبو دور مهم. باش كتجي احداث بحال اللي واقعة فالداخلة كيبان للسلطة باللي هاد الشي غير لخوا خاوي. واخا السلطة فراسها باللي هاد الشي غير لخوا الخاوي. عارفاه مزيان.
دابا شكون يقدم يتعامل وتواصل مع هاد العائلة اللي باغية تدويل القضية باغية تديها للامم المتحدة كاع.
حتى نخب المدينة من ابناء الصحراء عندهم مسافة كبيرة مع هاد النشاط ديال "الصحراوية". فمناسبات كثيرة تكلمو اولاد التراب على ان بحال هاد الانشطة وبحال شي استثمارات كتقدم تساهم فالاحتقان. غالبية الفنادق ديال هاد الجوج او غيرهم ما كيخدموش اولاد المنطقة وحتى لا خدموهم ما كيخدموش اولاد الداخلة ابا عن جد.
التوتر راه ماشي سببو قتل هادا او داك. راه اسبابو كثيرة منها كيفاش شي وحدين دازو البيزنس فالحوت فالعقار فلوطيلات فامور كثيرة فهاد المنطقة. هاد البيزنس كان خاصو يكون عامل استقرار تماك. يخلق الرواج ويدمج الساكنة فيه ماشي يزيد يبعدها وفاي مناسبة فشي شكل٬ بحال مقتل لحبيب اغريشي٬ كيبان لينا كنكبو الما فالرملة.
ديما كنقولو ونعاودو. كلشي الا اللعب فمنطقة بحال الداخلة. لعيون ما يقدروش يلعبو. اللعب تقريبا مستحيل مع وجود امثال ولد الرشيد٬ فالداخلة راه ناسها اولاد الناس وبزاف ولكن ايلى ناضو صعيب شي حد يسكتهم. شوفو كيفاش الاعيان ديال لمدينة تقريبا ما قربوش لهاد الملف ديال لحبيب. ايوا تجيب السلطات مولات الصحراوية تمشي تفاوض مع العائلة مادام كتهدر بهاد لكلام لكبير.
راكم ديرو اللي بغيتو ولكن لا يصح الا الصحيح. "الصحراوية" دابا كتشارك فاحتجاجات فالداخلة ماشي فسباق ونشاط اوعشي