الركراكي: برافو لحكيمي واخا زگل بينالتي انا اللي المسؤول

اكد الناخب الوطني وليد الركراكي ان المنتخب المغربي كان حسن من جنوب إفريقيا فثمن نهائي كوب دافريك، واخا الخسارة، وانه هو اللي كيتحمل المسؤولية وقال برافو على اشرف حكيمي واخا ضيعها.
وقال وليد الركراكي فحوار مع الرياضية: "فماتش حنوب أفريقيا سيطرنا وصلنا بزاف لبوطوهم، والاحصائيات كانت فصالحنا باش نربحو هذا الماتش وجاتنا بلانتي زگلناه وهادي كتوقع، وكنقول برافو لأشرف حكيمي اللي كانت عندو قوة الشخصية والكواج باش يمشي يضرب البلانتي وماشي ساهلة وعمرني غنلوم اللاعب اللي ضيع وانا ديما كنفرح للاعب اللي كيهز المسؤولية، وبالنسبة ليا يماركي بيلانتي على إسبانيا ونتأهلو لربع نهائي كوب ديموند احسن ما يماركيها على جنوب إفريقيا ونتأهلو لربع كوب دافريك".
وكمل الركراكي: "وكان اختيار ديالي انه يضرب هو البلانتي وانا كنأمن بحكيمي واخا زگل فتنزانيا وكان يقدر يماركيها وما كتابش ما ماركاهاش وانا اللي كنتحمل المسؤولية، ولكن باش يقولو مع جنوب إفريقيا ما كناش فالمستوى ديالنا وكنا نقدرو نديرو اكثر من هذا الشي لا، ضيعنا بزاف ديال الفرص الواضحين وهما جاتهم واحدة فالدقيقة 56 ماركاوها ومن بعد جات هاديك الكوفرة وبلاما نهضرو على الفرص ديال آخر الماتش ملي لعبنا ب 10 ومشينا باش نماركيو، غير هو جنوب افريقيا راه فريق ماشي ساهل وربح منتخبات مزيانين وتكلاصاو هما الثالثين، وماشي مفاجأة انهم ربحونا، وبقى فيا الحال على اللاعبين والشعب المغربي".