زيارة سانشيث لبلادنا وموقف إسبانيا الداعم للحكم الذاتي حطمو البوليساريو: هادشي مغاديش يغير طبيعة النزاع القانونية وكنحتارمو علاقات الجوار بين المغرب والصبليون

Elouali.zaz.1987@gmail.com
رونات الزيارة ديال رئيس الحكومة الإسبانية، بيدرو سانشيث، ووزير الشؤون الخارجية الإسبانية، خوسيه مانويل ألباريس، للمملكة المغربية ولقائهم بالملك محمد السادس وتأكيد موقف إسبانيا الداعم لمبادرة الحكم الذاتي، (رونات) البوليساريو اللي خرجات ببيان فيه بزاف ديال البكا.
وقالت البوليساريو فبيانها اللي نشراتو تمثيليتها فالصبليون وبانت فيه كترطب مع خفض فمستوى اللغة الصدامية، أن الاستمرار فإقامة العلاقات الثنائية بين إسبانيا والمغرب على أساس دعم مبادرة الحكم الذاتي كيعرض موقف الحكومة الإسبانية بخصوص حقوق الإنسان للخطر.
وأضافت البوليساريو أنها كتحتارم علاقات حسن الجوار بين جوج بلدان كيتمتعو بالسيادة، ولكن ما خصهاش تكون على حساب "تقرير المصير فالصحراء".
ورجعات البوليساريو للاجترار وإعادة تدوير نفس خطاباتها حول الموقف الإسباني فاش قالت أن "بيدرو سانشيث ضيع فرصة باش ياخد موقف يتماشى مع القانون الدولي".
وختمات أن إصرار بيدرو سانشيث على اعتبار الحكم الذاتي أساس واقعي لحل نزاع الصحراء "لا يغير من طبيعة النزاع القانونية"، ولكن واخا هكاك غادي تواصل "ممارسة جميع الإجراءات باش تحقق هدفها".