رحلة صعيبة للوداد إلى بوتسوانا بسبب السلطات البوتسوانية ورفض الكاف تأجيل الماتش

غيعاني الوداد الرياضي بزاف بسبب الرحلة الجوية ديال الفريق إلى بوتسوانا، لمواجهة گلاكسي البوتسواني فدوري أبطال افريقيا، وهذا الشي حيث السلطات البوتسوانية تعطلت باش تعطي لطيارة بعثة الفريق ترخيص للنزول فالأراضي ديالها، والكاف ما بغاش يؤجل الماتش.
وعلمت "گود" من مصادر مطلعة أن الرحلة الجوية الخاصة ديال الوداد الرياضي اللي غيرافقو فيها فريق نهضة بركان واللي حتى هو عندو نفس الطراجي حيث غيمشي يلعب كاس الكاف فجنوب افريقيا مع سيخوخون، غتنطلق من مطار محمد الخامس من الدار البيضاء اليوم الخميس مع 10 الليل، وغتمشي الطيارة تهز النهضة البركانية من مطار وجدة وتشد الطريق.
وحسب نفس المصادر، فالطيارة ديال بعثة الوداد الرياضي غتحط الفريق غدا الجمعة الصباح فمطار مدينة گابورون البوتسوانية ومن بعدها غيشد الفريق طيارة خاصة صغيرة كراوها الواك باش تنقل البعثة إلى مدينة جوانينگ فين غيلعبو ضد گلاكسي.
وغيمشيو الوداد الرياضي اللي رفض الاتحاد الأفريقي طلب الفريق بتأجيل الماتش من السبت الجاي إلى الأحد اللي وراه، (غيمشيو) نيشان ملي يوصلو لجوانينگ يديرو آخر حصة تدريبية قبل الماتش وهي الحصة اللي غتكون مع 3 ديال العشية وهو نفس توقيت الماتش السبت الجاي، وهذا الشي كيأكد ان الرحلة ديال الفريق غتكون شاقة بسبب تأخر السلطات البوتسوانية فالموافقة على نزول الطيارة الودادية فالأراضي البوتسوانية حيث كانوا الوداد مبرمجين مع نهضة بركان يشدو الطريق البارح الاربعاء ويوصلو اليوم الخميس.