لغلا ديال طيارة لارام غيخلي الوداد يضربو الطريق قبل ماتش گلاكسي ورحلة مسخسخة عند "غزاة إفريقيا"

رحلة صعيبة ومسخسخة كتسنى الوداد الرياضي ممثل الكورة المغربية فشومبيونزليگ، باش يمشيو يلعبو ضد گلاكسي البوتسواني فبوتسوانا ضمن الجولة الخامسة من دور لگروبات.
وكيواجهو الوداد الرياضي مشكل غلا ثمن كراء الطيارة الخاصة اللي تنقل الفريق ففول سبيسيال ديريكت من الدار البيضاء إلى بوتسوانا، وكانوا معولين يشدو الطريق يوم 20 فبراير، ولكن لارام طلبت لهم حوالي 400 مليون سنتيم، وهذا الشي صعيب يحطوه الواك فهاد الظروف اللي كيدوز منها النادي، خصوصا وأن المسؤولين عليه دابا كيحاولو يلقاو استقرار للموارد المالية.
واضطرو الوداد دابا لتغيير موعد انطلاق الرحلة ديال الفريق إلى بوتسوانا واللي غيكون فيها 3 المحطات قبل الوصول إلى مدينة جوانينگ البوتسوانية اللي كاينة فجنوب بوتسوانا باش يلعبو ضد گلاكسي، وغيسافرو الوداد يوم 19 من هاد فبراير، والرحلة غتبدا فطيارة من كازا للخليج ومن الخليج غياخدو طيارة ثانية لجنوب إفريقيا، ومن جنوب إفريقيا غياخدو طيارة اخرى لبوتسوانا وبالضبط العاصمة گابرون، ومنها غياخدو الحافلة اللي غتضرب بهم حوالي 500 كيلومتر إلى جوانينگ باش يلعبو ضد گلاكسي يوم 24 فبراير.
الوداد كان ديما فعهد المكاتب السابقة برئاسة سعيد الناصيري واللي قبل منو عبد الإله أكرم كيديبلاصا غالبا فالطيارات الخاصة ديال لارام، وخصوصا المسافات الطويلة وكان النادي كيتحمل ديما مصاريف الرحلات، واليوم وفاش الفريق كيحاول يخرج من الأزمة والمسؤولين ديالو برئاسة عبد المجيد البرناكي مقاتلين باش يخرجو الحمرا من الأزمة اللي كتعيش، وكيحاولو يجيبو فلوس ويوفرو موارد مالية قارة، حتى حد ما عقل على النادي من غير ماليه، وكأن الواك عمرو ما طار فطيارات لارام وهو اللي كان فالسنوات الماضية كيصول ويجول فلافريك فالطائرات المغربية لتشريف الكورة المغربية وحصد الألقاب حتى تلقب الوداد بغزاة إفريقيا.