لاسك تعادلو مع سيمبا والوداد خاصهم يربحو گلاكسي وميموزا ويتسناو كادو

سالا ماتش أسيك ميموزا الايفواري وسيمبا التنزاني بالتعادل السلبي زيرو لزيرو اليوم الجمعة فالكوت ديفوار، ضمن الجولة 5 من دور مجموعات دوري أبطال افريقيا، وهذا الشي ما كيخدمش مصالح الوداد وكيزيد يصعب عليه مهمة التأهل لربع النهائي.
ومن بعد هذا التعادل زكاو أسيك ميموزا صدارتهم للگروب الثاني من دوري ابطال افريقيا وضمنو التأهل لربع النهائي كمتصدرين قبل الجولة الأخيرة برصيد 11 نقطة، ووراهم سيمبا التنزاني فالمركز الثاني اللي عندو 6 النقاط، وگلاكسي البرتسواني فالمركز الثالث ب 4 النقاط، ثم الوداد الرياضي فالمركز الأخير برصيد 3 بوان.
المهمة ديال الوداد الرياضي صعابت بزاف فالتأهل إلى ربع نهائي دوري ابطال افريقيا، وحتى حاجة ما برجلين اللاعبين ديالهم، حيث واخا يربحو ماتش غدا ضد گلاكسي غيولي رصيدهم 6 النقاط أي غيتعادلو مع سيمبا التنزاني فرصيد النقاط مع أفضلية لسيمبا بحكم النسبة الخاصة، وبالتالي خاصهم فالجولة الأخيرة يربحو أسيك ميموزا اللي صافي ضمن التأهل كمتصدر للكروب، ويتسناو شي هدية من گلاكسي ضد سيمبا فتنزانيا، يربحوهم او على الاقل يتعادلو معهم واخا هذا الشي غيكون صعيب حيث سيمبا كيكون صعاب فتيرانهم وقدام جمهورهم، ولكن دابا المهم يرح الفريق الاحمر الماتش ضد گلاكسي غدا، ويحافظ على الحظوظ ديالو وبعدها لكل حادث حديث.