قيادة الاستقلال غادير مؤتمر شكلي بعدما علنو بالاجماع على نزار بركة مرشح وحيد والحرب غاتبدا فلجنة القوانين لتقزيم نفوذ ولد الرشيد فالتنظيم

كشف مصدر استقلالي ل"گود" أن التوجه العام داخل اللجنة التنفيذية لحزب الاستقلال، هو يدوز المؤتمر الوطني بلا صداع ولا صراعات على المناصب من خلال الاحتفاظ بجميع أعضاء اللجنة التنفيذية الحالية بعد المؤتمر المقبل.
وقال المصدر ل"گود" بلي "دبا مايقدروش يزكيو نزار بركة بدون انتخاب، ويجيو للجنة التنفيذية ويديرو فيها انتخابات"، مضيفا :"دبا اتافقو بيناتهم للحفاظ على الوضع على ما هو عليه، وإجراء مؤتمر شكلي فقط للملائمة مع القانون التنظيمي للاحزاب السياسية وأيضا وخاصة باش يأخذو الدعم من وزارة الداخلية اللي وقفاتو ليهوم هادي عامين.
ولم يستبعد نفس المصدر يكون شي سيناريو وجدو تيار نزار بركة باش يشعلو الصداع فلجنة القوانين.
وكما العادة فهاد السيناريوهات كيتحركو شباب الحزب باش ينوضو الصداع وباش يضغطو على تيار ولد الرشيد بتقديم مقترح تخفيض عدد أعضاء المجلس الوطني إلى 600 عضو ومنع المنتخبين وخاصة البرلمانيين من العضوية بالصفة في المجلس.
فالاخير غادي يتدخل نزار بركة باش عاود إخللي الوضع على ما هو عليه وولد الرشيد يعتابر تدخل نزار إنقادا له من هزيمة أخرى. يقول ذات المصدر.
الحاصول، راه المونطاج ديال المؤتمر واجد وغادي يكون فيه بداية تفكيك إمبراطورية آل ولد الرشيد وتقزيم حضورها فقط في استوزار ولدهوم محمد ولد الرشيد .