حسب منطق شيبو المتخلف فالتحليل...تا مغربي محترف ما يمكن يلعب فالمنتخب. دياز كيبقى مغربي وطنيته كاملة مكمولة سوا لعب معانا او مع الصبليون

يوسف شيبو المواطن المغربي الساكن فقطر، واللي مثل فأكثر من سبعين مقابلة المنتخب الوطني، تصيبه من فينة لأخرى نوبات من الشعبوية المشرقية المقيتة التي تعلمها فاستديوهات بيين بالدوحة، واللي فالمغرب ما عندنا تا علاقة بيها نهائيا.
آخرها هي المزايدة ديالو على براهيم دياز لتأخره في حسم قراره بحمل قميص المنتخب الوطني، واعتبرو أنه كيزايد على المغرب بهاد التأخير.
المشكلة فيوسف شيبو أنه دائما يبحث عن وهم البطولة والوطنية الخالصة على الطريقة المشرقية، ويا ريت كون جات من شي واحد غير ملم بالموضوع ممكن نتفهموه، ولكن شيبو لعب لسنوات فالمنتخب وجاور محترفين كبار، وعرف الضغط وصعوبة الاختيار اللي تيكون عند هاد اللعابة.
دياز أو غيره من اللاعبين، غالبا العلاقة اللي كتجمعهم بالمغرب هي علاقة نوستالجية ديال الآباء والأجداد، وملي كيقررو يلعبو للمنتخب خصوصا فحالة دياز اللي ما كانتش عندو الجنسية المغربية، فالأمر كيكون أصعب لا على المستوى الشخصي، ولا الرياضي بحكم أنه كيلعب فأحسن نادي فالعالم، مع كل ما يعنيه من مستشهرين وتهديد بفقدان المكان لا لعب فكأس إفريقيا مثلا.
بالإضافة لهادشي كامل، فتاريخ المنتخب حافل بلاعبين لعبو فالفئات السنية كاملة د منتخبات أوروبية وفاللخر ختارو المغرب، اشمن رسالة باغين نصيفطو لهاد اللعابة بهاد المزايدات دشيبو واللي بحالو؟
ثم المغرب اللي رسميا كيفتخر بجميع الكفاءات وبنفس المنطق، هل مطلوب منا أننا نبخسو وطنية المغاربة الأطباء والمهندسين والعلماء فالخارج لأنهم مكيمارسوش مهنهم فالمغرب؟
ونبداو بشيبو نيت علاش كيحلل الكرة فبيين سبور وماشي فالرياضية مثلا؟ ايلا كان غير على المزايدات فبحرها طويل وأكيد أن شيبو غير مؤهل يفتي فيها وهو كيخاف يقول رأي كروي واضح فحق قطر ومنتخبها، ولا حتى فحق الحكم القطري اللي حكم مقابلة الترتيب بين المغرب وكرواتيا.
إبراهيم دياز سواء جا للمغرب أو لا، فهو كيبقى مغربي، وطنيته كاملة مكمولة مكاينش اللي غيحيدها ليه من الأساس، والمحترفين اللي فبرا الحمد الله ما كيفهموش اللغة باش كيهضر شيبو، وإلا ما غيبقاوش يجيو تال للمغرب فالعطلة من الأساس.