البوليساريو: تسليم الصبليون إدارة المجال الجوي ديال الصحرا للمغرب ماشي رسمي وإلى كان غادي نتابعو مدريد فمحكمة العدل الأوروبية

Elouali.zaz.1987@gmail.com
توعدات جبهة البوليساريو الصبليون باللجوء لمحكمة العدل الدولية فحالة سلمات إدارة المجال الجوي ديال الصحرا للمملكة المغربية.
وفتصريحات للقيادي فالبوليساريو أبي بشرايا البشير، قال إن قضية تسليم الصبليون لإدارة المجال الجوي للصحرا للمملكة المغربية فحالة ما كانت صحيحة واخا ما كاين حتى شي حاجة رسمية دابا، فإن "الحكومة الإسبانية ستواجه الملاحقة أمام الهيئات القضائية الدولية ومنها محكمة العدل الأوروبية".
وهاجم المتحدث الصبليون متهما إياها أنها قدمات بزاف ديال "التنازلات" للمغرب فيما يخص نزاع الصحراء، وبدات هاد التنازلات بدعم مبادرة الحكم الذاتي ودابا بغات تعطي للمغرب الوسائل باش يضفي الشرعية على مغربية الصحراء، على حد تعبيره.
وانتقد القيادي فجبهة البوليساريو الموقف الإسباني من نزاع الصحراء وزعم أنها "تتعارض مع لوائح الأمم المتحدة"، متهما الحكومة الإسبانية بضرب استقرار منطقة المغرب العربي.
الموقف الإسباني من نزاع الصحراء داير صداع كبير للبوليساريو والجزائر وسبب هادشي أن الصبليون مستعمر سابق للمنطقة وعندها دور فيه، ودعمها لمبادرة الحكم الذاتي هو سبب رئيسي يخلي دول اخرى وخاصة أوروبية باش تمشي على هاد النهج وتهدم أطروحة نظام العسكر والبوليساريو.