دياز فرحان بعيالات المنتخب المغربي وكيشجعهم يتأهلو لأولمبياد باريس

عبر الدولي المغربي براهيم دياز نجم ريال مدريد الإسباني على الفرحة ديالو بالمنتخب المغربي النسوي اللي ربح البارح الجمعة منتخب زامبيا، فذهاب الدور الرابع والأخير المؤهل إلى أولمبياد باريس 2024.
وبارطاجا براهيم دياز الفرحة ديالو بعيالات المنتخب المغربي، مع المغاربة والمتابعين له فأنستغرام وحط نجم ريال مدريد سطوري فيه تصويرة ديال لاعبات المغرب، ومعها الدرابو ديال المغرب وقلب حمر، كتعبير منو على تمغرابيت ديالو، وتشجيع منو لهم باش يربحو ماتش الروتور ضد زامبيا الثلاثاء الجاي فالرباط باش يتأهلو لأولمبياد باريس.
وكيأكد براهيم دياز فينما كتجيه الفرص، ان الاختيار ديال اللعب للمغرب بلاد الاب والأجداد ديالو، هو اختيار بالقلب كيفما كيقول، وانه كيبغي المغرب والمغاربة داكشي وعندو ارتباط وجداني بهم.