منين غادية تجيب الحكومة لفلوس لتمويل الزيادة فالاجور وواش غادية تزيد فالضرائب او تاخد كريدي؟ مسؤول ل"كود": انهاك الميزانية خط احمر والاستدانة ما يمكنش وها علاش وما كاينة زيادة فالضرائب وها علاش تفكرنا الطبقة المتوسطة

دابا منين الحكومة غادية تمول هاد الزيادة اللي علناتها اليوم مع النقابات؟ واش هاد الشي غادي ينهك الميزانية كيف قالت اصوات من المعارضة الحكومية؟ حسب مسؤول حكومي ل"كود" هاد الزيادة ما غادياش تنهك الميزانية لسبب بسيط ان انهاك ميزانية الدولة خط احمر.
مصدر مسؤول اخر اكد ل"كود" باللي ما يمكنش للحكومة تاخد قرار بحال هادا بلا ما يكون عندها باش. اي ما يمكنش تطلق شي ريال الا ايلى كان عندها هاد الريال.
بخصوص واش غادية تكون زيادة فالضرائب او شي كريدي لتمويل الزيادة لموظفي القطاع العام؟٬ قال مصدر "كود" باللي ما غادي يكون لا هادا ولا داك. الزيادة غادية تكون الف درهم للفئات اللي ما ستافداتش من الزيادة هادي سنوات. غادي يشمل الطبقة المتوسطة٬ فاطار توجه عام للحكومة باش يكون عندنا مجتمع متماسك وقوي.
بخصوص ما اثارته المعارضة خاصة البي جي دي بخصوص الاستدانة من اجل تمويل هاد الزيادة٬ قال مصدر "كود" باللي للي كيقول هاد لكلام عندو نسبة كبيرة من الغباء٬ موضحا ل"كود" انو ممنوع فالقانون التنظيمي ممنوع الاستدانة الا للمشاريع الاستثمارية اي يستحيل تحصل على كريدي باش تخلص زيادة فالاجور
تمويل هاد الزيادة الخاصة بالقطاع العام غادية تكون من ارتفاع مداخيل الضرائب بحال الضريبة علي القيمة المضافة ومحاربة الحكومة للفواتير الوهمية.... هاد الشي خلى مداخيل الدولة من الضرائب ترتافع
وكانت الحكومة وقعات اليوم مع المركزيات النقابية الاكثر تمثيلا والباطرونا اتفاق مهم بالزيادة فالصالير. بيان الحكومة قال باللي المستفيدين من تحسين الدخل من نهار بدا الحوار الاجتماعي وصل 4 ملايين و250 ألف، فيهم مليون و250 ألف موظف في القطاع العام و3 ملايين أجير بالقطاع الخاص.
دابا تم الاتفاق على زيادة عامة فأجور العاملين في القطاع العام اللي ما ستافدوش من الزيادة من هادي كثر من 10 سنين. هادو غادي يتزاد ليهم الف درهم م صافية شهريا.
طبعا من غير هاد الشي كاين اجراءات تخفيض الضريبة على الدخل بالنسبة لجميع الموظفين والأجراء، بأثر شهري يصل إلى 400 درهم بالنسبة للفئات متوسطة الدخل، والرفع من الحد الأدنى للأجر بنسبة 10 في المائة جديدة في هذه الجولة، تنضاف إلى زيادة سابقة بنسبة مماثلة، وبذلك يرتفع الحد الأدنى للأجر بنسبة 20 في المائة، والرفع من الحد الأدنى للأجر الفلاحي بنسبة 10 في المائة جديدة، تنضاف إلى زيادة سابقة بنسبة 15 في المائة، وبالتالي يرتفع الحد الأدنى للأجر الفلاحي بنسبة 25 في المائة منذ مجيء هذه الحكومة.
ديك الضريبة على الدخل غادي يبدا تطبيقها فشهر يوليوز اللي جاي.