كازا كلشي فيها كازاوي. العمدة الرميلي: 65 فالمائة من بيضاوا كيتنقلو على رجليهم فمدينة سكانها 4 مليون ويدخل ليها ويخرج منها 12 مليون وهدفنا نقل 2 مليون فالنقل العمومي

البارح 2 ماي 2024 فندوة "كازا فافق 2030" اللي نظماتها مجلة "لاڤي ايكو" الاسبوعية ف"پالاس دانفا فكازا كشفات عمدة الدار البيضاء نبيلة الرميلي عن معطيات بخصوص حاضر ومستقبل اكبر مدن المغرب.
الرميلي فمداخلتها بعد ما ذكرات باللي لمدينة ساكنها 4 مليون شخص وهاد الرقم كيضاعف باش يوصل 12 مليون٬ اي كيدخلها ويخرجها يوميا 8 مليون٬ تكلمات على التنقل فهاد لمدينة. بخصوص النقل العمومي كاين 600 الف كازاوي كيستعملو. منهم شبكة طوبيسات متطورة صديقة للبيئة عددها 700 كتنقل 400 الف بيضاوي فيما 200 الف كيستعملو الترام بخطوطو اللي مغطية كل مناطق كازا تقريبا ومازال غتوسع. حاليا كاين 100 كلمتر.
لكن المثير فالارقام اللي قدماتهم العمدة هو ان 65 بالمائة فكازا كيتنقلو على رجليهم. واكدات الرميلي ان الهدف هو هاد الرقم ينزل وعليه غادي يكون عند كازا من هنا قبل 2030 "ار او ار" ديالها اي شبكة جهوية سريعة فالترانات يعني احياء تران "البيضاوي" ولكن بسرعة اكثر.
الخط المستقبلي٬ كيف قدماتو العمدة وقبلها رئيس الجهة معزوز عبد اللطيف٬ كيربط الملعب الكبير فابن سليمان للمطار =24 كلمتر= وغيكون خط من بنسليمان لكازا.
ولكن خاص مسؤولي كازا ما تجيهمش هاد 65 بالمائة كلها سلبية. اللي خاصو يكون هو الامن وهادوك اللي كيتمشاو على رجليهم باش يخدمو يتمشاو فبلايص مزيانة وما يگريسيهم حد وما يتبسل عليهم حد وتكون الانارة والامان..... المشي راه صحي بزاف غير خاص لمدينة توفر شروطو كاملة.
نرجعو للنقل العمومي٬ كازا غادي يكون فيها كذلك وفق العمدة فالندوة اللي نظماتها "لا ڤي ايكو" اكبر محطة للقطارات. غادية تكون فمكتب المعارض اللي معروفة بمكتب الصرف فخرجة كازا تقاطع مراكش والجديدة قريب لكلية الحقوق الشهيرة طريق الجديدة. هاد المحطة كيف اكدات العمدة غادية تكون الاكبر فالمغرب وفافريقيا.
العمدة اكدات فنفس الندوة باللي توفر كازا على ميترو مازال فكرة قائمة. مازال هاد لمدينة يقدر يكون عندها ميترو ديالها