مدير سونارجيس كيطير من المقلة. راك ماشي منظم للمونديال راه خدمتك تبني وتسير ماشي تقرر فين يتلعب الفينال: ملعب بنسليمان غيهز 115 الف متفرج وغيكون جاهز قبل 2030

مدير عام الشركة الوطنية لانشاء وتدبير الملاعب الرياضية "سونارجيس" سميتو يوسف بلقاسمي اللي كان هادي سنوات كيقدم راسو الوزير الفعلي للتربية والتعليم باش كان كاتب عام٬ مازال عندو غرور كبير. البارح لخميس 2 ماي 2024 فندوة مزيانة دارتها مجلة "لاڤي ايكو" الاسبوعية بكازا على "الدار البيضاء في افق 2030" وحضرها عمدة الدار البيضاء نبيلة الرميلي ورئيس الجهة عبد اللطيف معزوز والرئيس المدير العام للخطوط الملكية المغربية حميد عدو٬ تكلم هاد مدير "سونارجيس" بحال ايلى هو المكلف ب"المغرب 2030′′.
بلقاسمي اللي عزيز عليه راسو بعد ما قال كلام معروف قبل بحال ان الملعب الكبير ديال كازا للي غادي يكون بنسليمان سعتو غادية تكون 115 الف متفرج وبللي غادي يكون حداه 4 الملاعب للتداريب وفضاءات مختالفة باش يولي قطب كيجلب ليه كازاوا٬ دخل فكلام ما عندو علاقة ب"كازا فافق 2030′′ بحال شروط الفيفا لاختيار ملاعب المباريات خاصة فالدور الثاني. بحال ان المغرب يقدر يحتاضن الافتتاح او الاختتام ديال المونديال. بحال الربط السككي بين بنسليمان وكازا والمطار.
علاش؟ اولا قضية واش المغرب يحتاضن الافتتاح او الاختتام هادي كتهم فوزي لقجع باعتبار ان رئيس الدولة محمد السادس عينو لمنصب للاشراف على ملف المغرب فمونديال 2030. اما التيرانات واش فيهم شروط او لا. كنهدر على شروط الفيفا٬ فحتى هو موضوع ماشي انت اللي خاصك تتكلم عليه. انت تتكلف بالتسيير والبناء اي طاشرون ومن بعد ياخد السانديك. القرارات ماشي بيدك.
حتى باش هدر على التران الجهوي اللي غادي يوصل لبنسليمان كان غير كيكرر كلام قالو رئيس جهة كازا عبد اللطيف معزوز وعمدة المدينة نبيلة الرميلي.
كان يهدر فقط على المراحل للي وصل ليها الملعب لكبير ببنسليمان والاعداد دابا لدفتر تحملات قبل ما يطلقو طلبات العروض. سالات مرحلة اختيار التصميم اللي داها ولد فتح لله والعلو "والعلو وشوي" مع شي مكتب "بوبيلوس".
باختصار هاد بلقاسمي مهدار ما عطى خبار وسابق ليلة بنهار. عجبو راسو بحضور كبير للندوة فيهم القنصل العام لاسبانيا بالدار البيضاء