خبارات زوينين لكازاوا. غيكون لكازا زون لوجيستيك يجمع كلشي وزبالة ميريكان تحولات لجردة وحديقة الحيوان ديال عين السبع كتفتح للجمهور ومتحف جديد كيخرج ومهرجانات منها واحد دالعيطة وها فين وصل المسرح الكبير

البارح لخميس 2 ماي 2024 باوطيل "انفا بالاس" دارت اسبوعية "لاڤي ايكو" ندوة مزيانة علي "كازا فافق 2030". فهاد الندوة اللي دارها مدير النشر فهد العراقي وشاركات فيها عمدة المدينة نبيلة الرميلي ورئيس الجهة عبد اللطيف معزوز والرئيس المدير العام للخطوط الملكية المغربية حميد عدو ومدير عام "سونارجيس" يوسف بلقاسمي٬ كشفات الرميلي علي كيفاش غتكون كازا من هنا ل6 سنين. فالنقل العمومي. فالبينيات التحتية...
من لخبار المزيانة هو ان حديقة عين السبع للحيوانات الشهيرة غادية تفتاتح هاد الصيف. الحديقة بحالها بحال فضاءات اخرى خضرا غادية تبان او بانت فعاصمة المغرب الاقتصادية. قبل ايام كان تحولات زبالة ماريكان الشهيرة اللي بين سيدي مومن وحي مولاي رشيد لحديقة. مساحتها 12 هكتار. غادي يكون بارك فالحي المحمدي كيف اكدات العمدة واللي كشفات ان لمدينة خاص يكون فكل مقاطعة من مقاطعاتها 16 حديقة كاملة مكمولة. للنزاهة. للعب. للمشي.
كازا كيف وضحات العمدة يالله عندها متر كاري اخضر لكل مواطن٬ بينما منظمة الصحة العالمية كتوصي باللي خاص 5 متر مربع لكل مواطن. اذن الخدمة مازال كاينة
هم العمدة الطبيبة هو تكون مدينة بهواء نقي. عليها بدات اجراءات فيها بناء فضاءات خضراء ومنع الكاميوات لكبار يدخلو لكازا واطلاق وسائل نقل عمومية بحال 700 طوبيس والترام اللي كتلوث اقل بكثير من وسائل النقل اللي كانت فكازا.
مركز المدينة غادي فهاد الاتجاه. كازا غادي يكون عندها "زون لوجيستيك" و"زون للصناعة الغذائية". هاد الشي غادي يكون خارج لمدينة ويجمع اسواق الخضر واللحوم والدجاج والحوت وصحاب درب عمر.......ايلى دار هاد الشي ف3 سنين كازا غادية تنفس سواء انقى
فالثقافة علنات العمدة فنفس الندوة باللي غادي يكون للمدينة متحف بالاضافة الي متحف ليلى امزيان مرات عثمان بنجلون اللي قرب يسالي لبني ديالو وللي كاين فتقاطع شارعي الروداني مع مولاي يوسف. العمدة قالت باللي غادي يكون توقيع اتفاق مع رئيس مؤسسة متاحف المغرب المهدي قطبي قريبا.
طبعا لمدينة غادية تعرف مهرجانات منها مهرجان للعيطة واشكال فنية ما كشفاتش عليها٬ وفجوابها علي المسرح الكبير ووقتاش يتفتح٬ قالت العمدة باللي كاين تفكير فادارتو الفنية والبرمجة وخاص يكون هاد الشي عالمي. باين هاد الشي غادي يزيد ياخد الوقت. المسرح سالى هادي مدة. دابا الصيانة ديالو راها كثيرة. باش يدور بين الموظفين والبرمجة الفنية والانتاج الفني ومصاريفو فالصيانة طلقات العمدة رقم 100 مليون درهم سنويا اللي غادي يطلع علي لمدينة. اذن خاص تفكير فاشراك كبريات المؤسسات الاقتصادية فالبلاد باش تساهم فميزانيتو