المصريين عجبهم فوزي لقجع: بغينا رئيس كورة بحالو

عبرو بزاف من المصريين على الإعجاب ديالهم برئيس الجامعة الملكية المغربية لكرة القدم فوزي لقجع وعضو المكتب التنفيذي للكاف والاتحاد الدولي الفيفا، من بعد الخرجة الإعلامية الأخيرة، اللي كان مع قناة On Time Sport المصرية واللي كشف من خلالها على مجموعة من الحقائق والمواقف ديالو هو والمغرب الداعمة للكورة المصرية، وايضاً وضح ان ما عندو حتى مسؤولية من قضايا دارت جدل وسط الجماهير المصرية بحال فينال دوري الأبطال افريقيا بين الوداد والاهلي المصري عام 2022.
ومن بين المصريين اللي عبرو على إعجابهم بشخصية فوزي لقجع وتمنى يكون رئيس الاتحاد المصري لكرة القدم، بحال رئيس الجامعة الملكية المغربية لكرة القدم، النجم السابق لكورة المصرية ميدو، اللي خدام دابا كإعلامي ومحلل فقناة "المحور"، واللي كان من أكبر المنتقدين لفوزي لقجع لدرجة انه كان خرج واحد المرة كيقول ان لقجع كيتحكم فالكاف، وطبعا هذا الشي نفاه فوزي لقجع فلانتيرفيو الاخير بالحجة والدليل، وقال ميدو اللي الموقف ديال تبدل 180 درجة بعد حوار لقجع مع القناة المصرية وقال عليه: "اول حاجة كتحس بها فلانتيرفيو ديال فوزي لقجع هي الحسرة، أنا ملي تفرجت فيه حسيت بالحسرة.. هذا هو رئيس اتحاد الكورة اللي خاصو يكون رئيس اتحاد الكورة ديالك مع احترامي لاي واحد.. رجل مسؤول ومثقف وعارف شنو كيقول، وكيبان انه رجل عندو رؤية وماشي ديكتاتور وكيخدّم الأدوات اللي عندو وكنحيي المغاربة اللي خرجو من عندهم شخصية بحالو".
وكمل ميدو: "هذا الشي كيبين لك ان المغرب عندهم اطر ومدربين مزيانين باش تنافس، وماشي عيب انك تغير من المغرب والمغاربة خوتنا وحبابنا وعندي صحابي بزاف مغاربة وكلهم ولاد البلاد وولاد الاصل وما شفتش منهم غير الخير، المغاربة عندهم غيرة وكيخدمو جابو اتحاد كورة خدامين كيصنعو كوادر وخدمو ناس مكونين واستافدو من الناس ديال الكورة بحال نور الدين نيبت ومصطفى حجي، خاصنا نديرو بحالهم ماشي نحرگو النجوم ديالنا ونجيبو شي حد نخدموه باش نحرگوه".
وزاد النجم السابق للكورة المصرية وتوتنهام واياكس، وقال: "نراهنكم أن 95٪؜ من الشعب المصري تفرج فلانتيرفيو ديال فوزي لقجع ما حسش واخا غير بشويا ديال الحسرة، حنا ما كنقارنوش ناس بناس، ولكن خاص يكون رئيس اتحاد الكورة قوي ومسؤول وعندو إنجازات وناجح وعندو خبرات فالكورة والرياضية وماشي بالضروري يكون داز لاعب ديال الكورة ولكن يكون عاش فالضومين وخدم فيه على الأرض وناس كلها غاتحتارمو".