برافو لقجع. كليتي لعصا وبزاف ظلما وغامرتي بالمدرب شهرين قبل المونديال وزرعي فالركراكي وفاللعابة: اييه علاش اللا كأس العالم

هاد الماتش اللي داروه الاسود البارح لثلاث 6 دجنبر 2022 بسطاد المدينة التعليمية فالدوحة فثمن نهاية كأس العالم قطر 2022 كان بطولي. لعابة كيبان ليك كلهم دخلو مخدرين بالاجواء الحماسية الاستثنائية للجمهور ولكن طريقة لعبهم وقتاليتهم وصمودهم ضد واحد من احسن المنتخبات فالعالم كان فوق كل التوقعات. المدرب وليد الركراكي دبر هاد الماتش باحترافية كبيرة. هادو تشكرو. شكروهم لمغاربة فكل مدن المغرب وفكل بلاصة فالعالم خرجو احتافلو بيها بالانتصار على اسبانيا والتأهل للثمن.
لكن هاد الشي كولو ما كانش غادي يكون بلا شجاعة مسؤول. حنا ف"كود" كنا ضد ابعاد وحيد خليلوفيتش وضد تغييرات قبل المونديال. لكن هاد المسؤول اللي هو فوزي لقجع رئيس الجامعة الملكية المغربية لكرة القدم دار مغامرة كلها اخطار وثمنها كان يكون كبير.
تجي وتغير لانترينور اللي غادي يديك لكأس العالم قبل شهرين خاص يكون اسمك لقجع. فوزي تعرض ظلما لحملات خايبة ضدو قبل المونديال. حملات قادوها شي وحدين محسوبين على الاسلاميين ودخلو معاهم شي وحدين خراين. كتعقلو قبل طالبو برحيلو. طلقو عليه اشاعات. بغاوه يمشي مع وحيد.
لكن فوزي حس وفهم باللي اللي تزگل لينا فمونديال 2018 بروسيا نقدرو نديروه فقطر 2022. فالمونديال الروسي كان عندنا منتخب مزيان ومدرب قافز وحظ عوج مع اخطاء كل واحد من المدرب واللعابة يتحمل نصيب منها.
لكن فهاد المونديال بحدسو العالي عرف باللي هادي هي المناسبة. باش تعين الركراكي كلشي كان كيهدر علي كأس افريقيا فابيدجان المقبلة. يعني المونديال راه فمجموعة قاصحة بزاف فيها بلجيكا وكرواتيا وكندا ايلى درنا شي نتيجة نجيو الثالثين. هو كان مقتانع ومتاكد باللي غادي يتاهل. لقجع فكأس افريقيا فكأس العالم ومع الاندية المغربية ديما طموحو بعيد بزاف. ديما كيشوف الطوب.
بفضل لقجع ويمكن الناس تجيهم غريبة٬ ولات لغة مدرب الاسود وليد الركراكي كتهدر على امكانية الفوز بكأس العالم. علاش اللا.
لقجع تخصص المالية مسكون بالكورة. فتخصصو باش كان مدير الميزانية فوزارة المالية ودابا الوزير المنتدب لدي وزيرة الاقتصاد المكلف بالميزانية٬ ثم بعد التحاقو باللجنة التنفيذية للكاف اولا ثم الفيفا ثانيا شاف العالم اللي الفوق. شاف الدول لكبيرة فالكورة كيفاش كتفكر. آمن بالمغربي وبامكانية يوصل للعالمية. ديما مآمن بيها.
هدا الثقافة ديال ومالنا حنا ما نديوش المونديال هو مولاها. هو اللي زرعها فاللعابة وفالمدرب. شي وحدين كيعتابرو حضورو وشخصيتو لقوية بعض المرات فالماتشات النهائية يزيد يضغط على اللعابة. هو ديما دورو ماشي التكتيك ولا الخطط. دورو يحسسهم باللي هما طوب وما كاينش فرق بينهم وبين كبار اللعابة فالعالم. كيخليوهم يزيدو يثيقو فريوسهم. فامكانياتهم. زياش المعروف بميزاجيتو داير ماتشات عمرو مع الاسود. بحال ايلى كيكفر علي كاع اللي داز وكاع ماتشاتو مع تشيلسي. علاش؟ حقاش لقى ناس فاهمينو وفاهمين تقلباتو وديما مكبرين بيه وبزاف.
برافو للقجع حقاش خاصنا نبداو نعتارفو بخدمة اي مسؤول ونتحاسبو مع اي واحد قصر. لقجع داير خدمة مزيانة فالجامعة. للكورة المغربية. دايرها مع مسيرين فغالبيتهم كيعيقو تقدم كرة القدم المغربية. دايرها فبيئة كروية ورياضية ماشي حتى لهيه فبلادنا.
شخصيتو باينة فالمنتخب. هو اللي يستحق يتهز فوق لكتاف مع وليد الركراكي. ما خاص يبقى يجي حتى شي مسؤول كيف ما كان نوعو عند اللعابة. يشوف الماتش ويمشي فحالو. الا طبعا ايلى جا ولي العهد او رئيس الدولة هادي قصة اخرى. يجيك واحد كينقز بحال هاداك وزير الخارجية بوريطة ويحاول يبان٬ كيف كيدير ديما٬ حتى فالرياضة واخا ما عندو علاقة بيها٬ هادي بلاش.
يخليو لفوزي المنتخب راه قاد بيه. يخليوه فعالمو راه عايشو وكثر. دابا راه فحالة ما يمكنش تصوروها. فرحان ولكن مازال باغي يمشي بعيد. باش تهدر معاه كيقول بلغة صحاب بركان "أ سمع اخويا ن.... حنا هنا باش نلعبو 7 الماتشات" هادي قالها قبل حتى من الماتش اللول والتعادل ضد كرواتيا. راه متصوف مسكون بالمغرب. الكورة عندو نموذج للمغرب اللي ممكن يكون غدا. رفع الراس راك مغربي. المستحيل ما كاينش. عايشها وكيبغي ينقلها كاع اللي كيعرف