وشوفو شي مغاربة عايشين هنا وباغيين يرجعو فرنسيين بزز. سياسية كالت "فرنسا جذوها يهودية مسيحية" و"عرقها ابيض" ناضو مقلقين وانتوما اش دخلكم واش كاين شي عنصرية اكثر من اللي عندنا مع "الافارقة" /فيديو

شي مغاربة تالفين. عايشين فالمغرب خدامين فالمغرب وفيهم اللي مرفحين من المغرب واحيانا باساليب مختلطة ماشي صافية ولكن عقلهم ففرنسا. كل حاجة كتوقع فباريس كيعلقو عليها كيناقشوها كيبارطاجيو الا ما تقوله الصحافة الفرنسية. فهاد العينة هي اللي كان منهم اللي تفاجأ بفوز العدالة والتنمية. طبيعي حقاش ما عارفش اش واقع فبلادو.
البارح السبت سياسية من "الجمهوريين" تدعى نادين مورانو قالت في برنامج روكيي على "فرانس 2″ "اون ني با كوشي" قولة للجينرال دوكول "فرنسا اصولها يهودية مسيحية وعرقها "ابيض". صبحو بعد ما فطرو مقلقين. كيبارطاجيو وكيسبو وكيحيحو. الله يهديكم يا هادو. ديوها فالمغرب. بلادكم فيها جرعة كبيرة للعنصرية. وماشي بعيد بعض هاد العينة مخدمين افارقة او اصحاب البشرة السوداء ومكرفصينهم ولكن غير سمحو هاديك الكلمة "العرق الابيض" ضرهم خاطرهم. هاد الشي ما عندو فهم. يبدو ان سحنة البعض من هادو اللي ماشي بيضين ولكن "قمحيين" هي اللي حركات فيهم هاد الغيرة. لان بعضهم لم يشارك يوما في وقفة او مسيرة ضد ما يعانيه الافارقة جنوب الصحراء من عنصرية في بلادنا٬ لان لا احد منهم احتج يوما على تراثنا الشعبي الحامل بالافكار العنصرية ولكن تكالت فباريس ومن بيضة باغيين يحتجو. هاديك بلاد عندها منطقها لو ان مغربي يعيش هناك في فرنسا تحدث كان الامر عاديا فمن حقه لانه يعيش هناك لكن ان يحشر بعض المتهافتين انفوهم في قضايا باش يبانو وما كيديرو والو باش يحاربو العنصرية راه اكثر من النفاق هاد الشي