شوف يا منير يا ماجيدي. راه لا انت لا غيرك تخوفني بالمسخرين فالموقع المشؤوم: ايلى خلعني شي شرفاء فهاد الوطن ما غاديش تخلعني انا. ايلى عينك فالعمير ولا السعودية ما ديرنيش الحيط لقصير

من اخلاقياتنا منذ تأسيس "كود" ما نردوش على الصحافيين. وقع بعض المرات جبدناهم. كان خطأ. انا صحافي من قبيلة الصحافيين. اومن بالقبيلة. بحال كاع مزاب وادافع عليها. هي بحال المجتمع. فيها ولد الزنى وفيها ولد الناس. ديما كنشوف بان ولاد الناس هي الغالبية العظمي فيها. هادا موقفي لا يلزم غيري
الهجوم اللي تعرضات ليه "كود" باش بدات عن طريق صحف ما عمرنا جاوبنا. كنجاوبو اللي مسخرينهم كنجاوبو مالين الشي. لكبار. حتى هاد المرة ما غادي لا نهدر على الصحافيين. على المأجورين على لمسخرين. كنفضل نبقى حتى خطنا ونتكلمو على انجازات الصحافيين من خلال فوزهم بجوائز او تحقيقهم لتميز داخلي او خارجي. كنكبرو بزاف بالصحافيين فاي جريدة او موقع خدامين فيه ايلى رفعو راس المهنة.
هاد المقدمة باش نكول ما غاديش نكتب على الموقع المعلوم 360 غادي نكتب على اللي كيكولو موالاه محمد منير الماجيدي مدير الكتابة الخاصة للملك. نوض بحث وسول وشوف اش كيدار باسمك.
اييه هما اللي خدامين فيه كيكولو باللي منير مولاه. هادوك لمسخرين اللي طالقهم كينهشو فلحم عباد الله ايلى خوفو بعض ضعاف النفوس ما غاديش يخوفوني. حقاش كود" موقع نزيه رفض ويرفض الدخول في اية مساومة للهجوم على هذه الجهة ترضية لارضاء اطراف في الدولة.
يا منير يا الماجيدي نعاود نكولها راهم هما اللي كيكولو للناس ورا ظهرك باللي الموقع ديالك وباللي انت مولاه وكيكولو للصحافة ما عندك علاقة. هاد الناس ايلى كيصفيو حسابات مع رجال اعمال وصحافيين ما غاديش نسمح ليك ولا لغيرك تتطاول على "كود".
حنا ما غاديش تخلعنا ولا ترهبنا. المغرب ماشي ديالك دير فيه اللي بغيتي وتطرد منو اللي ما كيعجبك. انت ما احترمتيش منصبك وقررتي تورط راسك او تخلي ناس ياكلو فمك الثومة. سبو ناس نزهاء شرفاء بحال كريم التازي وعبد المومني واحمد رضى بنشمسي وعلي لمرابط واللائحة طويلة. تصفية حساباتك مع رجال اعمال كالصفريوي والشعبي ثم احيزون قبل ما ياخذ ليك بلاصتك ويولي الموقع اياه مدافعا عنه. هاد الشي ما كيخلعنيش وما غاديش يخلعني لانه "اذا اتتك مذمة من ناقص فهي الشهادة لي باني كامل". رغم انني ما كندعيش الكمال ابدا. انا صحافي يؤمن بمغرب يعيش فيه المغاربة بحرية وامن وعدالة.
ضرب موقع محسوب عليك لاعراض الناس من خلال الاقلام المأجورة يا منير الماجيدي لا تشرف المسؤولية التي تتحملها كمدير كتابة خاصة للملك. اذا لم تحترم هذا المنصب فذاك شأنك لكن ان تطلق المأجورين لسب اعراض الناس فلن اسمح لا لك ولا لغيرك ان يفعل.
ما تخلعنيش بهادو اللي غادين يهربو عليك نهار يلقاو لحم اكثر يكددو فيه ولا طيح من لبلاصة اللي. ايلى بغيتي يا الماجيدي تسب عثمان العمير ولا المملكة العربية السعودية عن طريق هاد لمسخرين، شغلك لكن ما نخلعنيش وتوظفني بهاد القذارة. ايلى بغيتي تهاجم اخنوش ولا العلمي ما ديرنيش حيط قصير. انا عارف قيمتي مزيان ويمكن ليك تسولهم هما
كل تدوينة على الفايسبوك من طرف لمسخرين العاملين في الموقع غير المحترم 360 سيكون الرد عليك انت. لكبير كيرد الا على لكبار. وغادي نحتفظ بحقوقي باش نتابع الصغار ونجاوب لكبار ولكن ما غاديش نطلب 5 المليون ديال الدرهم.