المساواة في الارث لا تهدد العرش. نهار اقترحت فلجنة تعديل الدستور تكون بنت الملك الاولى ولية للعهد

نهار مشيت نقدم اقتراحاتي بشأن تعديل الدستور للجنة المانوني، كان من بين الإقتراحات لي قدمت هو أن الملك الى تزادت ليه بنت هي اللولة فيكون من حقها تتربع على العرش ومايبقاش الأمر محصور فالذكور فقط، هاد الإقتراح كان نابع من ايماني بالتساوي بين الجنسين مع تحيزي جيهة النساء بأنهم الأفضل فالتدبير والتسيير إلا ورثوا الجينات الملائمة، وحتى كوني ذكر مكنتش كنعتابرو امتياز بل عائق يحول بيني وبين نمط العيش الطفيلي لي باغي نعيشوا.
ديما كنت كنعتابر ولادتي كذكر عبأ كبير ومسؤولية ، فكوني ذكر فخاص نتبث هاد الأمر يوميا فالحياة وفمجتمع ذكوري بحال ديالنا فالأمر مكيبقاش مرتابط بالقضيب الرحماني الرفيع المستوى كمجداف قارب الذي ورثه عن أجدادي، وإنما بإلتزامات ومسؤوليات كتحملهم منذ الطفولة، خاصك تحضي ختك متهزش رجليها إلا بعقد نكاح حيث شرفك. نتا لي تتكفل بأغلب الأعمال البدنية والقذرة ، تضربها الى اقتضى الحال أو فراه نتا ماشي راجل ( العلاقات بين الناس عند الفئات الشعبية مبنية على العنف والسيطرة والذكورية)، وتخدم عليها حتى تتزوج فحالة مكانش باك هو المعيل الوحيد للأسرة وتشاركتي معاه هاد المسؤولية من الصغر.
لذا كبرت كنحسد ختي على كلشي حتى بزازلها والشق لي بين رجليها، وأنا رغم اعجابي بقضيبي كنت كنعتابرو تقل كبير هازو بين رجليا وكندور بيه٬ كنعتبرو مجموعة من القيم والتقاليد والأخلاق والعقائد المتركزة عليه هو بالضبط ، فكنت ملي كيفيقني الواليد نمشي معاه للسوق مع الخمسة ديال الصباح وختي تبقى ناعسة حتى للعشرة، كنكره كوني ذكر، علاش لي ماتنوضش هي وأنا نبقى ناعس واش جلطيطة عندها كاع هاد المسؤوليات، وكنت كنحسدها لأنها عمرها خدمات أو تكرفصات أو ضربات تمارة ومن دار باها لدار راجلها، من معيل لمعيل بينما أنا غي طواليت شوية قالي الواليد ايما عاوني وحرر رزقك أو سير دبر على راسك الله يعاونك أنا راه منصرفش على واحد كتافو قدي، ولكن مقابل الطعام والمسكن والحماية وشي شوية ديال الحنان كانت الحرية ديالها مصادرة، متختارش آش تلبس فوقاش تخرج فين تمشي معامن تترافق الى بغات تاهيا تفريح لقريد أو تضرب الطاسة فهذا كان كيعني أنها ولات قحبة على خلافي لي كيتعتابر غي خرجان الطريق والله يرد بيا و أنا غي دري كيما كان الحال منوحلش فواليديا، هاكة كيفكرو العديد من المغاربة وفق البنية الإقتصادية القروية ديالهم، وحتى لهنا كان طبيعي وواقعي أيضا أن الأنثى تاخد نصف الميراث.
هاد النمودج من الإناث راه مابقاش هو السائد، حاليا المرأة خرجات لسوق العمل وخرجات للحياة بصفة عامة وخرجات من تحت يد باها وخوها وباقي الذكور فأسرتها، وكاينة حالات عديدة ديال نساء معيلات للأسر ديالهم ، المرأة ولات كتكون ثروة وكتمتالك، وملي تموت بناتها مايديوش قد ولادها غي حيث عندهم الجلطيطة، وحقا راه بقات عي الجليطيطة حيث فالمنظومة الإقتصادية الحالية الذكورة أصبحت عبأ أكثر مما هي امتياز كيف كانت قبل قرون، المساواة ولات حقيقة وفكولشي علاش متكونش حتى فالورث.