القبول بالاختلاف: إيلى ما فهمتيش بأنك كا تساهم في تربية هبش، بدل الحرفة آعزيزي…

عبد اللطيف اكنوش٬ استاذ باحث في جامعة الحسن الاول بسطات ////
واحد البنية إسبانية نجحات بزاف في إسبانيا من خلال البرنامج اللي كا تدوزو القناة الرابعة الإسبانية، وللي سميتو "أمير واحد لثلاثا ديال الأميرات"…بالطبع بحال هاذ البرامج كتسيل الريوغ ديال شي مجاحيم ديالنا، باش يبداو في اللمز والغمز، وفي الطعن في عاراض بحال هاذ البنية، وذاك الشي للي على بالكم، وللي بلاشك تابعتوه وشفتوه معا لبنى أبيدار على هامش "الزين للي فيك"، وللي ضححك فينا العادي والبادي، ورجعونا هيوش وما كا نعرفوش آشنو هيا السينما، وآشنو هي الفنون، وما خلاو فينا غير للي نساو…
قريت واحد "الخبر" في واحد الموقع إخباري ديالنا، واحد "الريكيزيطوار" على هاذ البنية للي سميتها "ريم رينام" وعايشة في إسبانيا، وغادي غير نعطيكم منو شي شذرات، ونتوما غادين تفهمو غير بوحدكم…كا يقول الصحافي ديال هاذ الموقع ما يلي:
" أثار ظهور الشابة المغربية ريم رينام على صدر المجلة الإسبانية "أنترفيو"، وهي شبه عارية، اهتمام الصحافة المشتغلة بالمملكة الأيبيرية؛ لاسيما أن الأمر يتعلق بفتاة ذات أصول مغربية مسلمة…"…لاحظو معايا أن الأخ الصحافي ما فلتش السيدة، ومشى ديريكت للعري واللباس، وشير عليها بعبارة " فتاة ذات أصول مسلمة"…زعما لاش الإشارة لدينها؟؟ ما علينا..
الأخ الصحافي ما توقفش هنا، لا…ذكر سميتها كاملة، وقال أنها تنحدر من مدينة الرباط…آالعززززز…إيوا آسيدي وري للدواعش فين ساكنة كاع، وديهم انتا ليها كاع…
وعلاه تحسابوه توقف؟ أبدا…زاد كا يقول: "أن الفتاة أجرت حوارا مع مجلة "أنترفيو" الإسبانية، وقالت: "أن تناول لحم الخنزير ليس معصية، لأنه حيوان مثله مثل باقي الكائنات، وكذلك شرب الكحول ليس معصية..أنا مسلمة في القرن 21، وعلينا أن نمتلك عقلية منفتحة. وبخصوص علاقاتي الغرامية، أحب أن يكون الشاب وسيما ومرحا ومثقفا، كما أنني فخورة بمشاركتي في البرنامج، وأمنيتي هي المشاركة في نسخة 2016 من برنامج "Supervivientes"، ومعناه بالعربية "الناجون""….
الأخ الصحافي حلق فوق واحد المعلومة وداز عليها بسرعة 20 سنة ضوئية من الفوق، وشار ليها غير بزز منو، لأنو قالها بالزربا وفجوج كليمات باش ما تبانش معيقة…وهي أن هاذ الأخت الشابة الوالد ديالها ما مسلم ما حتى وزة…هو إسباني تزوج بسيدة من الرباط، والدرية مللي وصلات 15 عام، هزات هيا ووالديها قلوعهم ومشاو لبلاد الوالد ديالها غير باش ما يتلاقاوش كمامر يعكرو عليهم الجو بحال هاذ الصحافي، وهذا شغلهم وكا يدخل في حريتهم الشخصية…
ولكن تكون مسلمة، ولا تكون مسيحية، ولا يهودية، ولا بوذية ولا الكرموس الهندي، انتا آش مشى ليك تمشي غير للجانب الديني والأخلاقي؟؟؟ أنا بعدا في بلاصتو والله ما ندوي عليها ولا نكتب عليها بهاذ الشكل ديال التحراش وديال الغمز واللمز والتقلاز من تحت الجلابة..آخويا هي حرة في بلادها إسبانيا تاكل الحلوف، ولا تشرب الماحيا، ولا حتى الشليمان اللي يضرب بوها كاع…واش انتا شغلك في دينها؟ واش انتا شغلك في آش كا تعشق ولا آش كاتاكل ولا تشرب؟ واش شغلك في نوع الدراري للي كاتبغي تخرج معاهم؟ واش شغلك في آش كا تدير معاهم؟…
هاذ الشي آعزيزي غير باش نييبك واحد الشويا، ونقول ليك أن الصحافي والمثقف ديالنا خاصو يحضي مزيان آش كا يخررج على درقوشو، ويحتارم اختلاف الآخر، و"سيرتو" يعلم القراء ديالو معنى "قبول الاختلاف، وعدم الخوف من الاختلاف، وواجب قبول الآخر، وحب الآخر المختلف عنا"، فراه الصحافي حتى هو معلم الأجيال ماشي غير الأستاذ، إيلى ما فهمتيهاش، بدل الحرفة…