والي بني ملال خنيفرة كيشوهنا: آسي الوالي علاش "تدعم انحراف الأخلاق"؟ واش على النهود المدللية والأجساد العريانة؟؟ وهاد العبارة جبتيها من شي قانون مغربي حنا ماعارفينوش؟؟

اگنوش عبد اللطيف أستاذ باحث في العلوم السياسية بجامعة الحسن الاول سطات ////
عقلتو على ديك المنظمة للي سميتها "فيمن" FEMEN، وللي معروفة بالاحتجاج ديالها من "أجل الدفاع عن حقوق الإنسان والأقليات العرقية والجنسية" وداك الباكور؟ عقلتو بللي جاو لبني ملال وتظاهرو باستعمال "أسلحة الدمار الشامل" ديالهم وللي هيا "نهودهم وأجسادهم العريانة"؟؟ جاو، قال ليك، باش يدافعو على دوك جوجد ديال الدراي للي كانو كايتعاشقو في دارهوم ودخل عليهم الهيشر ودكهوم عصا…
السلطات ديال بني ملال شداتهوم وجرات عليهم من البلاد، وهاذا من حقها القانوني…وما عند الواحد مايقول…المغرب عندو نظامو العام، للي ماشي هو النظام العام في فرنسا ولا ماريكان ولا الجابون…
أنا للي ضرني شويا، هو "البيان" الرسمي للي كتبو هاذ الوالي باش يخبر الرأي العام الوطني والدولي بطبيعة الحال..لأن العادة في العلاقات الدولية هو أن السفارات كاتتلققف بحال هاذ التويشيات ديال البيانات الرسمية باش تخبر بها حكوماتها في الخارج، باش تبين ليها مستوى دولة الحق والقانون في البلاد صاحبة البيان الرسمي…آش كا يقول باكم الوالي..قراو آش كتب:
" تطبيقا لمقتضيات القانون رقم 02-03 المتعلق بدخول وإقامة الأجانب بالمملكة المغربية، قررت ولاية الجهة "طرد المواطنتين الفرنسيتين اللتين دخلتا المغرب يوم الأحد 10 أبريل، والمنتميتين إلى منظمة أجنبية تدعم انحراف الأخلاق" !!!
السيد عطا وصف "رسمي مغربي" للمنظمة ديال "فيمن" FEMEN…قال بأنها "تدعم انحراف الأخلاق"…وما عطاهاش الوصف باش هيا كاتقدم نفسها للناس والعالم، يعني منظمة لمساندة حقوق الإنسان والأقليات الجنسية وغيرها"…باش عرفتيها آسي الوالي بأنها "تدعم انحراف الأخلاق"؟ واش على النهود المدللية والأجساد العريانة؟؟ لأن وصفك كايدخل في خانة "الحكم الأخلاقي وحكم القيمة" كيف ما كانقولو في العربية…واش آسيدي "دعم انحراف الأخلاق" عبارة جبتيها من شي قانون مغربي حنا ماعارفينوش؟؟ كيفاش بغيتي يحكمو علينا الأجانب وعلى دولتنا مللي سلطة رسمية ديال البلاد كاتكتب في بياناتها الرسمية "أحكام قيمية" ؟؟ كيفاش بغيتي الدول الأخرى غدا يساندوك في المحافل الدولية في المصائب للي حنا كانعيشوها على الصعيد الدولي؟؟ كون كان بيان ديال ميليشيات "الأمر بالمنكر" ديال الرعاوين، نقول ماكاين باس، هادوك راه غير هيوش…ولكن والي جهة بقدو وبقامتو؟؟؟
ياسيدي، كان عليك تكتب في البيان الرسمي ديالك: " تطبيقا لمقتضيات القانون رقم 02-03 المتعلق بدخول وإقامة الأجانب بالمملكة المغربية، قررت ولاية الجهة طرد المواطنتين الفرنسيتين اللتين دخلتا المغرب يوم الأحد 10 أبريل، لأن طريقة احتجاجهن تتعارض مع النظام العام السائد في المغرب"، وسدينا…لأنه كاع الدول عندها نظام عام خاص بيها…وللي نظامها العام يمكن يقبلو، نظامنا العام حنايا يمكن يتعارض معاه، وصافي…
الحاصول راه غادي يقولو علينا في هاذ القضية، ماشي غير الشعب للي يمكن يجي منو التكلاخ، لا…راه حتى للي حاكمين مكلخين…الله يستر وصافي…