آش من صورة كاتعطيو للأجانب على القضاء وعلى الأجهزة المكلفة بإنفاذ القانون ديالنا؟ كانسمي هاذ "اللعب" سياسة دولة بالتمام والكمال

عبد اللطيف اگنوش أستاذ باحث جامعة الحسن الاول سطات ////
عقلتو داك النهار على الدريات ديال إنزكان ياك؟ الشمايت نوضو عليهم الغوت وتكرفسو عليهم حينت، حاكا، مقزبات ولابسات حواج كاتخدش الحياء وحنا في بلد مسلم..البوليس جا..عوض يشد المعتدين، قرقب على الضحايا بتهمة "الاخلال بالحياء العام".. ناض الغوات ديال المجتمع المدني شرقا وغربا، القضاء دار "مارش آريير"، وطلق الدريات وعاد فاق لدوك مساخيط الوالدين للي تعداو عليهم وشدهوم..كالو ديك الساعة: وغير وقع الخطأ، ماكاين باس…
نفس اللعيبىة تعاودات مع الاعتداء على السيد ديال فاس بحجة أنو "مثلي"، يعني ما مرا ما راجل، يعني صنف ديال البشر، ومنو عداد، للي ما كيشبهش في ميولاتو الجنسية، للراجل ولا للمرأة…من بعد أسبوعين ديال الغوت في السما وفي الأرض، عاد القضاء قال ليك "قام بإصلاح الخطأ"…ماكاين باس آسيدي، تيقناكم…
دابا الدراري بجوج للي كانو كايتعاشقو في دارهم، ودخلو عليهم مساخيط الوالدين ودكوهم عصا وخررجوهم من دارهم عريانين…القضاء في الابتدائي قرقب على الضحيتين، وطلق ليا ولاد القحاب…البارح، في المرحلة الاستئنافية عودتاني، قال ليك راه القضاء "أصلح الخطأ"..عاد حكم بالحبس على المعتدين، وطلق الدراي للي كانو كايمارسو حياتهم الطبيعية بالنسبة لجنسهم…
أنا راني كانسمي هاذ "اللعب" سياسة دولة بالتمام والكمال…لأنه بزاف على بول اسماعيل…غير كل مرة البوليس والقضاء يقودوها، ومللي ينوض الغوات في الفايس بوك في المغرب وفي القنوات الأجنبية، عاد القضاء كا يصلح الخطأ…والله واخا تحلفو ليا بمولاي يعقوب وتقولو ليا هاذا راه غير "السير العادي للعدالة"، لا تقت بيكم…هاذا كانسميوه عندنا: بنادم للي كايكوي وكا يبخخ وسياسة دولة بالتمام والكمال…بمعنى أنني نخللي الميليشيات ديال "الأمر بالمنكر" تدير للي بغات في عباد الرحمان لأسباب "أخلاقية"، نقرقب على ضحايا الميليشيات نديرهم في الحبس، ونتسنى…إيلى بوزبال سقل وسكت، لا عين شافت لا قلب وجع، إيلى ولاد الحرام ديال شبكات التواصل الاجتماعي نوضو عليا الغوت، عندي الاستئناف فين نتدارك الأمر، وعندي بزاف ديال التويشيات المسطرية والقانونية الجوهرية للي تمكنني نلعب فيها دور المدافع على "دولة الحق والقانون"..
آسيادي..دولة الحق والقانون راها ماشي غير بالمناسبات، وماشي غير بمنطق الربح والخسارة ديال الناس للي حاكمينا..يا إما كاينة، يا إما ماكيناش..تاقاو الله غير في هاذوك القضاة مساكن، اليوم يقولو كلام وغدا يقولو العكس…آش من صورة كاتعطيو للأجانب على القضاء ديالنا؟؟؟
باراكا من اللعب الله يجازيكم بخير، راكم شوهتو البلاد وشوهتونا معاكم…ما بقيناش نقدرو ندويو ولا نواجهو صحابنا الأجانب لا العاديين منهم ولا المثقفين ديالهم…وللينا كانحشمو نقولو راه حنا من المغرب، والله…