زينب بنموسى اللي حقق معاها الاف بي اي على تدوينة عاودات ل"كود" كلشي: كلت ليهم البوطة غير نكتة ومشكلتي مع كاع المتطرفين والمخزن زين وما بغيت لا تنشر لا والو

أياما قليلة بعد التحقيق مع عضو شبيبة البجيدي بسبب تدوينة متطرفة، حقق الاف بي اي مع زينب بنموسى مؤخرا بسبب تدوينة نشرتها على حسابها على موقع التواصل الاجتماعي :" أنا ببساطة متعصبة عنصرية أحارب الإسلام و أكره المسلمين، و كون نلقى نفد فيهم هجمة إرهابية ببوطاكاز، و مع اعدام مرسي و سجن الفيزازي و تعذيب القرضاوي."
هاد الشي كان يقدر يبقى بعيد على التحقيق لولا ان المكتب نفسه حقق مع عضو شبيبة العدالة والتنمية عمر الصنهاجي على تدوينة مماثلة فيها تحريض على العنف واخا قديمة تجبدات ليه.
زينب حكت ل"كود" تفاصيل هذا التحقيق الذي دام قرابة الثلاث ساعات. تقول "دخلوني للبيرو مباشرة مور مادزت فلاباراي و تقلب صاكي و داك الاجراءات الامنية المعلومة. خلت لقيت ربعا ديال الرجال ومرة، سولوني واش عندي شي دوا كاناخدو ولا شي حاجة". المحققون اضافوا وفق رواية زينب ل"كود" "قالولي الى حتاجيتي شي لعيبة قوليها للضابطة".
بخصوص الاسئلة قالت بنموسى "اول سؤال طرحوه عليا هو شكون انا،و شنو نقدر تقول على زينب و التوجه ديالها إجمالا ؟". المعنية بالامر قالت ل"كود" انها "ما عرفاش كيفاش تجاوب على هاد السؤال" "عمري فكرت نطرحو على راسي، و لا نفكر لو فجواب. حيت اصلا كون كنت لقيتلو الجواب ماكنتش غانكون فمكتب الخيام داك الصباح".
طبعا كانو اسئلة اخرى طرحوها عليها كما اوضحت ل"كود"٫ واهما التدوينة "سولوني علاش كتبت داكشي؟ او واش عندك مشكل شخصي مع الفيزازي و مرسي و القرضاوي؟ جاوبتهم بلا داكشي اصلا كتبتو مور الانفجار د نيس و انا عندي مشكل مع كاع المتطرفين بدون استثناء. و هادو لي دويت عليهم عطيتهم كمثال على ناس لي الدولة خدات فحقهم اجراء".
بخصوص البوطة قالت زينب انها اوضحت ل"كود" ان "اصلا البوطة جات فسياق واحد النكتة وصافي. والدليل انني كانستشهد باية قرآنية لتحت و ماعنديش نية نفركع شي حد و لا ندابز مع شي حد".
زينب اوضحت ل"كود" ان الاستنطاق شمل اسئلة عادية " لي ماداخلش فالمحضر غير لكتابة التقرير و داكشي" واكدت انه تم اقفاله وقالو ليها "سيري تهلاي فراسك. وحنا ماشي ضدك ، غير بنادم خصو يتجنب اي حاجة ممكن شي نهار تعرضو للمساءلة القانونية، و قالو ان هاد الاجراء كايحميني انا اولا قبل مايحمي شي حد حيت انا بنتهم".
زينب ختمت تصريحها ل"كود" بالقول ان "المخزن زين مالقيناش معاه المشكل، الكائن الفيسبوكي هو لي خايب حيت تشهرتي قبل منو (مابغيت لا نتشهر لا والو انا اصلا مشهورة، غير بنادم لي مسالي قبو كايحدد هو اهدافك فبلاصتك".
هاد التحقيق غير كيضيعو وقت الاف بي اي. واش كل نهار شاد خلية ارهابية داعشية وعطاوه قضية خاوية باينة من الطيارة باللي السيدة كتهدر وصافي.