راه عادي بنكيران يطلع هو الأول فاستطلاعات الرأي ! علاش المغاربة شكون كايعرفو من غيرو ؟

—
بزاف ديال الناس جاتهم فشكل انو بنكيران يطلع هو الأول فاستطلاعات الرأي حول شعبية رئيس الحكومة ! و الشك فالنتائج مسألة عادية خصوصا ملي كاتشوف اليوم بلي بزاف ديال هادوك لي كانو كايشوفو فبنكيران المهدي المنتظر حسو براسهم هزو القالب و ولاو اونتي بنكيران ! و لاجيتي تشوف راه معذورين … عرفتي شنو هي تكون كاتشوف فواحد السيد هو داك "المخلص " le sauveur ! سبارطاكيس محرر العبيد … لي غايجي و يجيب معاه الخير للمغاربة و يعيشو فداك الزمن الاسلامي الجميل (لي بالمناسبة ماعمرو ماكان اصلا غي كذبو علينا بيه الاساتذة ديال التربية الاسلامية) ! عرفتي شناهي يكونو الناس كايشوفو فيك "عمر بن الخطاب" لي غايرد ليهم حقهم و غي طلع للحكومة تهبط عليهم بزبارة ديال الاقتطاعات و الزيادات و التقشف و لي بغا يخدم لا و لي بغا يتوظف لا ! و تزيد تقودها عليهم اكثر ماهي مقودة ! رد الفعل الطبيعي هو ديك "الشعبية" ديالك تهبط للحضيض !
و لكن واخا هكاك مازال بنكيران عندو شعبية و شعبية كبيرة ! ماشي حيت بنكيران واعر ! و لكن حيت الخصوم ديال بنكيران عيانين بزااااااف … اسماء باهتة ! واش غانقارنو بنكيران لي كلشي عارف سميتو من الطبيب تال رجل الاعمال تال الخضار تال مول البيكوب كلهم عارفينو بنبيلة منيب لي كاتعرفها غي واحد النخبة معينة متابعة للشان السياسي ؟ واش غانقارنو شعبية بنكيران بشعبية العمري و لا لشكر ؟ شكون كايعرف لشكر ؟ هبطو لأي سويقة و سولو الناس شكون هو لشكر ؟ شكون هي نبيلة منيب ؟ انا متأكدة بلي الاجوبة غاتكون كوميدية تشبعو غا ضحك ! يقدر كاع بنادم يصحابو راه داوين على نبيلة عبيد الممثلة و على دريس لشكر شي لاعب مغربي محترف فالوكرة القطري! واش يمكن نقارنو بنكيران بشي واحد لا من الجداد لا من القدام ديال الساحة السياسية ؟ مايمكنش حيت الأول صنع واحد الماركة مسجلة سميتها "بنكيران" ! و وليتي تقدر تسمع فالزنقة واحد كايقول لصاحبو " راه اردوغان آ صاحبي هو بنكيران ديال تركيا" سمية بنكيران عوضات لقب رئيس الحكومة فحال سميت دانون لي عوضات سمية الياغورت و التيد لي عوضات سمية "المسحوق" كاتلقا مرا واقفة عند مول الحانوت كاتقوليه " عطيني واحد التيت "اومو" الله يرحم الواليدين" ….
وي بنكيران عندو شعبية و مازال غاتبقا عندو شعبية ! حيت هو الوحيد لحد الآن لي عرف يهضر مع المغاربة ، قولو عليه شعبوي ، قولو عليه مهرج، قولو عليه كايميع السياسة … السيد طاح على الكود بين و عارف يهضر و يسمعو الخضار و السيكليس و مولات المسمن قبل لوزير و الطبيب و الدكتور!
باش تقارن شعبية بنكيران خاص يكون عندك اصلا اختيار بين بنكيران و شي واحد آخور … باش تسول الناس " شكون يقدر يكون رئيس حكومة" و يجاوبوك خاص اصلا الناس تكون فواحد المجتمع لي عندو وعي سياسي واش حنا عندنا الاغلبية الساحقة ماكايعرفوش تا سميت المنتخب عن الدائرة ديالهم و غايعرفو ليك سميات أمناء الاحزاب و لي مرشحين لمنصب "رئيس الحكومة" ؟ علاش شكون كايعرفو من غيرو ؟ هو لي جا مع زمن الفايسبوك و التويتر و الصحافة الاكترونية و السمارتفون لي دازو قبل منو دازو في صمت …
وي بنكيران طفات شمعتو (او قريبة تطفا) وي قودها مع الشعب و خصوصا مورا قضية الاساتذة … و لكن كايبقا بنكيران أصل و الباقي تقليد و لي بغا ينافسو خاصو يطيح على الكود بين ديال المغاربة ! لي ماشي صعيب بزاف … ساهل فيه جوج كلمات "دين و عاطفة" ! يالاه هاحنا سهلنا عليكم المأمورية وا فرجونا … و ديرو شي كومبا دايزها الكلام فالانتخابات الجاية راه تا الشعب ماكرهش يشوف شي غريم ديال بنكيران و يحس براسو عندو الاختيار ماشي ولات الحكومة فحال الحانوت ديال العروبية كاتلقا عندو ماركة وحدة ديال السلعة و داكشي قليل و بايت!