ماكايناش شي جريمة أبشع من أن يكون الإنسان نباتيا …..را جدودنا مساكن ضحو بالغالي والنفيس في بلاد السافانا على ود اللحم … ونتوما باغيين تحرمونا منو

كاين بزاف ديال الدوافع للي جعلت الإنسان -عبر مدة طويلة من الزمن- أنه يقرر ينتمي لفصيلة النباتيين –بمختلف مشاربهم- ويتبنى موقف مناهض أحيانا لآكلي اللحوم,هاد الدوافع منها ما هو متعلق بإنتماء عقائدي كيكتسي واحد الطابع مقدس كما هو الشأن بالنسبة للبوذية والهندوسية والبهائيون والراستافاريون -على سبيل لمثال- لي مواقفهم واضحة بهاد الخصوص بحكم إحترامهم الشديد للحق في البقاء لكل كائن حي.. ثم على غرار ذلك كاينة عوتاني واحد العينة خرا كيتسماو ليفيجيتاليان -من مرهفي الأحاسيس- للي إنطلاقا من مرجعية أخلاقية -ومن باب الشفقة-كيرفضو ياكلو أي حاجة ذات مصدر حيواني رفضا باتا ,حيتاش –قاليك أسيدي- هما ضد سفك الدماء ديال الحيونات مساكن والتسبب لهم في الألم وإيذاء الطبيعة .وبدرجة أقل من –التطرف- لفيجيتاريان للي ماعندهمش مشكل ياكلو مشتقات الحيونات بحال لبيض ولحليب ولفرماج ولكن كيبقاو تاهما ناس "حناينين أوي"..
وفي غالب الإحيان جميع هاد "لفرق" كيزيكو مواقفهم "بفرضيات" كتدعي أنه طبيا وعلميا اللحم مضر بالصحة ديالنا … وبلا هما كيكونو معرضين للأمراض المستعصية بدرجة أقل من دوك لي كيصرطو كلشي بدون هوادة …..
والأكيد أن كل واحد لديه الحق باش يعتقد داكشي لي بغا ,وعندو مطلق الحرية أنه يتبنى أي شيء كيشوفو أنه مسكلو بطريقة ما ,
غير هو من من باب إبداء وجهة نظر ,أعتقد أنه ما من فكرة أغبى ولا أكلخ من أنه إنسان في كامل قواه العقلية والنفسية وكيعيش في ظل مجتمع كيعاني واحد الفسيفساء ديال التناقضات ,ينوض يزغبو الله ويختار من بينها كلها أنه يكون نباتي ,ويأخد إتجاهنا حنا "اللحميون المتوحشون" موقف -إصطدام- غير باش ربما يبان مختلف ومتميز…
وزايدون باش نكونو علميين تاحنا شوية –عزيزي النباتي- را أيلا تبعنا السلسة التطورية ديالنا غادي نلقاو مثلا بلا دوك السنان والضروس ماداروش هكاك إعتباطا أو باش نمضغو بهم لمسكة ولا ناكلو بهم الشعرية بلحليب ..وإنما الوجود ديالهم تما كان لمهمة مضغ اللحم وبولفاف وباولو وشوا ..
وحنا لهومو سابيان حسب بزاف ديال لفرضيات قلبنها صباط مع النياندرتال وتشامينا مع ديلمهم السليبات وحشيناه ليهم فلاخر غي على وديت داك اللحم لي كان كيشكل عنصر جد مهم في الهرم الغذائي ديالنا ديك الساعة في بلاد السافانا … يعني را عانينا بزاااف باش نحققو هاد "المكسب" ولله الحمد..هذا بالإضافة للرواية اللي كتقول أنه سيدنا إبراهيم خرجنا من ولدو مسكين خلعة .. وكان على بونت ماغايصفيها ليه تا عتق سيدي ربي الموقف في اخر لحظة .. .
ومن بعد هادشي كامل تجي نتا تبدا علينا لا ماخصكمش تسفكو دماء الحيونات البريئة وتاكلو اللحم ..حيت كيسبب الامراض …وكتديرو اختلال في التوزان الطبيعي وديك الهضرا لخاوية ….
لا لا أخويا حراااام عليا عرق جدودنا يمشي هكاك هباء منثورا ….